கடந்த மாதம் 28 ஆம் தேதியன்று ஈரான் மீது அமெரிக்கா மற்​றும் இஸ்​ரேல் தாக்குதலை நடத்தியது. இதனை தொடர்ந்து ஈரானும் பதில் தாக்குதலை நடத்தியது. இதனால் போராக மாறியது. இந்த போர் காரணமாக மத்திய கிழக்கு நாடுகளில் பதற்​றம் நிலவி வருகிறது.

அமெரிக்கா, இஸ்ரேல் கூட்டுப் படைக்கும், ஈரானுக்கும் இடையிலான போர் தீவிரமடைந்து வரும் நிலையில், உலகின் 25 சதவீத கச்சா எண்ணெய் போக்குவரத்து நடைபெறும் ஹார்முஸ் நீரிணையை ஈரான் மூடியது. ஹார்முஸ் நீரிணை வழியாக செல்லும் கப்பல்களுக்கு பாதுகாப்பு தரத் தயார் என அமெரிக்கா கூறிய நிலையில், ஏவுகணை கொண்டு தாக்குவோம் என ஈரான் எச்சரிக்கை விடுத்தது.

போர் பதற்​றம் காரணமாக சர்வதேச அளவில் கச்சா எண்​ணெய் விநி​யோகம் பாதிக்​கப்​பட்​டுள்​ளது. இதனால் கச்சா எண்​ணெய் விலை அதி​கரித்து வரு​கிறது. இந்தப் போர் தொடர்ந்தால் கச்சா எண்ணெய் இறக்குமதி செய்து வரும் நாடுகளில் வரும் நாட்களில் தட்டுப்பாடு ஏற்படும் சூழல் உள்ளதாக கணிக்கப்பட்டுள்ளது.

உக்​ரைன் மீது ரஷ்யா போர் தொடுத்​த​தால், ரஷ்​யா​விடம் இருந்து கச்சா எண்​ணெய் இறக்​குமதி செய்​வதை ஐரோப்​பிய நாடு​கள் நிறுத்தின. இந்​தியா தொடர்ந்து மலிவு விலை​யில் கச்சா எண்ணெய் வாங்கியது. இது உக்​ரைன் மீதான போருக்கு ரஷ்யாவை ஊக்​கு​விப்​ப​தாக இருக்கும் என்று இந்​தி​யா​வுக்கு அமெரிக்க அதிபர் ட்ரம்ப் கூடுதல் வரி விதித்தார் .

ரஷ்​யா​விடம் இருந்து கச்சா எண்​ணெய் இறக்​குமதி செய்​வதை நிறுத்த வேண்​டும் என்ற நிபந்​தனை அடிப்படையில் இந்தியாவுக்கான வரியை 18 சதவீத​மாக அமெரிக்கா குறைத்த​து. இதையடுத்து கடந்த சில வாரங்​களாக ரஷ்​யா​விடம் இருந்து கச்சா எண்​ணெய் வாங்​கு​வதை இந்​தியா குறைத்​தது.

ரஷ்​யா​விடம் இருந்து இந்​தியா நேரடி​யாகவோ அல்​லது மறை​முக​மாகவோ கச்சா எண்​ணெய் வாங்​கு​வது கண்டு​பிடிக்​கப்​பட்​டால், அமெரிக்கா 25 சதவீத கூடு​தல் வரியை மீண்​டும் விதிக்​கும் எனவும் கூறப்​பட்​டது குறிப்பிடத்தக்கது. தற்போது இந்நிலையில் தான் ரஷ்யாவிடமிருந்து கச்சா எண்ணெய் வாங்க, இந்தியாவிற்கு 30 நாட்கள் அமெரிக்கா அனுமதி அளித்துள்ளது .

இது தொடர்பாக தனது எக்ஸ் தள பக்கத்தில் பதிவிட்டுள்ள அமெரிக்க கருவூலச் செயலாளர் ஸ்காட் பெசென்ட், “அதிபர் டிரம்பின் எரிசக்தி நிகழ்ச்சி நிரலின் விளைவாக எண்ணெய் மற்றும் எரிவாயு உற்பத்தி இதுவரை இல்லாத அளவுக்கு உயர்ந்த மட்டங்களை எட்டியுள்ளது.

உலக சந்தையில் எண்ணெய் வரத்து தொடர்வதை உறுதி செய்வதற்காக, இந்திய சுத்திகரிப்பு நிறுவனங்கள் ரஷ்ய எண்ணெயை வாங்குவதற்கு அனுமதி அளிக்கும் விதமாக, கருவூலத் துறை தற்காலிகமாக 30 நாள் விலக்கு அளிக்கிறது. இந்த குறுகிய கால நடவடிக்கை, ரஷ்ய அரசாங்கத்திற்கு குறிப்பிடத்தக்க நிதி நன்மையை வழங்காது. ஏனெனில், இது ஏற்கனவே கடலில் சிக்கித் தவிக்கும் எண்ணெய் சம்பந்தப்பட்ட பரிவர்த்தனைகளை மட்டுமே அங்கீகரிக்கிறது என பதிவிட்டுள்ளார்.

இதனிடையே, இந்​தி​யா​வுக்கு கச்சா எண்​ணெய் விநி​யோகம் செய்ய ரஷ்யா எப்​போதும் தயார் என்று இந்​தி​யா​வுக்​கான ரஷ்ய தூதர் டெனிஸ் அலி​போவ் கூறி​யுள்​ளார்.