சென்னை அடுத்த கிளாம்பாக்கம் பேருந்து நிலையத்தில் இருந்து போதிய பேருந்துகள் இயக்கவில்லைக்கூறி பயணிகள் சாலை மறியல் போராட்டத்தில் ஈடுபட்டதால் பரபரப்பு ஏற்பட்டது. நேற்றிரவு 9 மணிக்கு மேல், திருச்சி, மதுரை, சேலம், திண்டுக்கல், தூத்துக்குடி, திருநெல்வேலி, புதுக்கோட்டை உள்ளிட்ட தென்மாவட்ட பகுதிகளுக்கு மிக குறைந்த அளவில் பேருந்துகள் இயக்கப்பட்டதாக கூறப்படுகிறது. குடும்பத்தினருடனும், குழந்தைகளுடனும் 2 மணி நேரத்திற்கு மேல் காத்திருந்த பயணிகள், இரவு 11 மணியளவில் புறப்பட்ட ஒருசில பேருந்துகளை முற்றுகையிட்டு தங்கள் பகுதிக்கும் பேருந்துகளை இயக்குமாறு வாக்குவாதத்தில் ஈடுபட்டனர்.

இதையடுத்து, சென்னை - திருச்சி தேசிய நெடுஞ்சாலையில் திடீரென அவர்கள் சாலை மறியலில் ஈடுபட்டனர். சுமார் 500க்கும் மேற்பட்ட பயணிகள் இந்த மறியலில் பங்கேற்றதால், நெடுஞ்சாலையின் இருபுறமும் சுமார் 3 கிலோ மீட்டர் தூரத்துக்கு போக்குவரத்து ஸ்தம்பித்தது.

சம்பவ இடத்திற்கு பேச்சுவார்த்தை நடந்த காவல்துறையினரிடம், பேருந்துகளை உடனடியாக இயக்கக் கோரி பயணிகள் கடும் வாக்குவாதத்தில் ஈடுபட்டனர்.

இதனையடுத்து நள்ளிரவு 2 மணிக்கு மேல் கூடுதல் பேருந்துகள் இயக்கப்பட்டதாக தகவல் வெளியாகி உள்ளது. இன்று முகூர்த்த நாள் என்பதால் பேருந்து நிலையத்திற்கு அதிகளவில் பயணிகள் வந்த நிலையில், போதிய அளவில் பேருந்துகள் இயக்கப்படவில்லை என கூறப்படுகிறது.