சேலத்தில் இன்ஸ்டா கிராம் மூலம் காதலித்து பெண்ணை மதம்மாற்றி ஊர் சுற்றிய இளைஞர் ஒருவர், திருமணம் செய்து கொள்ளக்கூறிய காதலியை ஏற்காடு மலைக்கு அழைத்துச்சென்று கொடூரமாக கொலை செய்ததாக கைது செய்யப்பட்டார்...

சேலம் மாவட்டம் ஏற்காடு மலைச்சாலையில் உள்ள 60 அடி பாலம் அடியில் இளம் பெண் ஒருவர் அழுகிய நிலையில் சடலமாக மீட்கப்பட்டார். அவரது அருகில் கைப்பற்றப்பட்ட கைப்பையில் இருந்து கைப்பற்றப்பட்ட அடையாள அட்டையில் புர்கா அணிந்திருந்த அந்த பெண்ணின் பெயர் லோக நாயகி என்றிருந்ததால் அதனை கொண்டு போலீசார் விசாரணையை முன்னெடுத்தனர்.

முதற்கட்ட விசாரணையில் சடலமாக மீட்கப்பட்டவர் லோக நாயகி என்பதும் அவர் சேலம் புதிய பேருந்து நிலையம் அருகே உள்ள பியூச்சர் விஷன் என்ற போட்டி தேர்வுக்களுக்கான பயிற்சி மையத்தில் பணிபுரிந்து வந்ததும் தெரியவந்தது. லோக நாயகியின் செல்போன் நம்பரை கொண்டு அவரிடம் கடைசியாக பேசிய நபர்களின் பெயர் விவரங்கள் சேகரிக்கப்பட்டது.

அதில் பெரம்பலூர் மாவட்டத்தை சேர்ந்த அப்துல் ஹபீஸ் என்ற நபர் கடைசியாக தொடர்பு கொண்டிருப்பதும், அவர் பல்வேறு நாட்கள் லோக நாயகியுடன் நீண்ட நேரம் பேசி இருப்பதும் தெரியவந்தது. அவரை பிடித்து விசாரித்த போது லோக நாயகி மரணத்துக்கான மர்மம் விலகியது. இன்ஸ்டாகிராம் மூலம் அறிமுகமான லோக நாயகியுடன் கடந்த ஒரு வருடமாக பழகிய அப்துல் ஹபீஸ், திருமணம் செய்து கொள்வதாக கூறி லோக நாயகியுடன் நெருங்கி பழகி வந்துள்ளார்

மேலும் தான் திருமணம் செய்து கொள்ள வேண்டுமானால் தங்கள் மதத்துக்கு மாற வேண்டும் என்று அப்துல் ஹபீஸ் வற்புறுத்தியதாகவும், லோக நாயகியும் அவனை நம்பி மதம் மாறி புர்கா அணிந்து பணிக்கு சென்று வரும் அளவுக்கு மாறியதாகவும் கூறப்படுகின்றது. அதன் பின்னரும் லோக நாயகியை ஆசைக்கு மட்டுமே பயன் படுத்தி வந்துள்ளார் ஹபீஸ், இந்த நிலையில் ஹபீஸ், தன்னை போலவே மேலும் சில பெண்களுடன் நெருங்கி பழகிவருவதை தெரிந்து சண்டையிட்ட லோக நாயகி, தான் ஏமாற்றப்பட்டதை உணர்ந்து , அப்துல் ஹபீஸிடம் பேசுவதை நிறுத்தி விட்டார்

இந்த நிலையில் தான் தவறை உணர்ந்து விட்டதாகவும், திருமணம் செய்து கொள்கிறேன் என்றும் ஆசை வார்த்தை கூறிய அப்துல் ஹபீஸ் , சில தினங்களுக்கு முன்பு லோக நாயகியை அழைத்துச்சென்றதாக கூறப்படுகின்றது. இந்த நிலையில் ஏற்காடு செல்லும் மலைசாலையில் 60 அடி பாலம் அருகே இருவரும் தோழிகளுடன் அமர்ந்து பேசிக் கொண்டிருந்த போது லோக நாயகிக்கு விஷ ஊசி போட்டு கொலை செய்து கீழே தள்ளியது விசாரணையில் தெரியவந்ததாக போலீசார் தெரிவித்தனர்.

பெரம்பலூரில் உள்ள தனியார் கல்லூரியில் பிஇ கம்ப்யூட்டர்சயின்ஸ் 4 -ம்ஆண்டு படித்து வரும் ஹபீஸ் ஆவடியை சேர்ந்த ஐடி ஊழியர் தவியா சுல்தானா என்பவரையும், விழுப்புரம் அரசு மருத்துவ கல்லூரி நர்சிங் மாணவி மோனிஷா என்பவருடனும் இன்ஸ்டாவில் நெருங்கி பழகி உள்ளார். இதனால் தான் லோக நாயகி பிரச்சனை செய்ததாக கூறப்படுகின்றது. இதையடுத்து லோக நாயகியை தீர்த்துக் கட்ட திட்டமிட்டு 3 பேரும் சேர்ந்து ஏற்காடு மலைக்கு இரவு நேரத்தில் அழைத்துச் சென்றுள்ளனர்.

செல்லும் வழியில் லோக நாயகிக்கு விஷ மருந்து ஏற்றப்பட்ட ஊசியை போட்டு அவர் மயங்கியதும் அவரை பாலத்தில் இருந்து தள்ளி விட்டது தெரியவந்துள்ளதாக போலீசார் தெரிவித்தனர். கல்லூரி மாணவர் ஹபீசை தொடர்ந்து அவரது தோழிகள் தாவியா சுல்தானா, மோனிஷா ஆகிய இருவரையும் போலீசார் கைது செய்தனர்.

இன்ஸ்டாகிராமில் இனிக்க இனிக்க பேசும் இளைஞர்களை நம்பி இளம் பெண்கள் காதலில் விழுந்து வாழ்க்கையை கெடுத்துக் கொள்ளாதீர்கள் என்று போலீசார் எச்சரித்துள்ளனர்.