சென்னை மாதவரத்தில் தந்தையை கொலை செய்து விட்டு வாடகை ஆட்டோவில் பயணித்த இளைஞரை , சமயோசிதமாக செயல்பட்ட ஆட்டோ ஓட்டுனர் காவல் நிலையத்தில் ஒப்படைத்தார்.

சம்பவத்தன்று கிண்டி அருகே இளைஞர் ஒருவர், மனநலம் பாதித்த தாயுடன் அப்துல் மாலிக்கின் ஆட்டோவில் ஏறி பாரிமுனை செல்ல வேண்டும் என தெரிவித்துள்ளார். ஆட்டோ சென்று கொண்டிருக்கும்போது, இளைஞரிடம், அந்த பெண் அப்பாவை கொன்றுவிட்டாயே என கூறியதையடுத்து சுதாரித்து கொண்ட அப்துல்மாலிக், மெதுவாக பேச்சுக் கொடுத்து அவரது சகோதரரின் செல்போன் எண்ணை வாங்கி தகவல் தெரிவித்துள்ளார். போலீசாரிடம் ஒப்படைக்கும்படி அவர் கூறியதையடுத்து, அப்துல்மாலிக் திருவல்லிக்கேணி காவல் நிலையத்திற்கு ஆட்டோவை ஓட்டி வந்து இளைஞரை ஒப்படைத்துள்ளார்.

விசாரனையில் அவர் ஆதம்பாக்கத்தை சேர்ந்த முரளிதரனின் மகன் ஆதித்யா நாராயணன் என்பது தெரியவந்தது. பொறியியல் படித்து விட்டு வேலைக்கு செல்லாமல் தந்தையிடம் பணம் கேட்டு தொந்தரவு செய்த நிலையில், பணம் கொடுக்க மறுத்ததால் தந்தையை கத்தியால் குத்தி கொன்றதாக போலீசார் தெரிவித்தனர்.