சென்னை சென்டிரல் ரெயில் நிலையத்தில் போலீசாரிடம் தப்பி ஓடிய செயின் பறிப்பு ஆசாமியை , போலீசார் வளர்த்து வந்த நாய் ஒன்று விரட்டிப்பிடித்த சிசிடிவி காட்சிகள் வெளியாகி உள்ளன. விசுவாசத்துக்கு மறுபெயராக சென்டிரலில் டியூட்டி பார்க்கும் டைகர் குறித்து விவரிக்கின்றது இந்த செய்தித்தொகுப்பு..

போலீசுக்கு டேக்கா கொடுத்து விட்டு நேக்கா தப்பி ஓடியவனை போலீசுக்கு துணையாக ஓடிச்சென்று கவ்விப்பிடித்து வந்த இந்த நன்றியுள்ள ஜீவன் டைகர் இது தாங்க..!

சென்னை செண்டிரல் ரெயில்வே காவல் நிலையத்திற்கு 2 வருடத்துக்கு முன்பு குட்டியாக வந்துள்ளது இந்த தெரு நாய். பசிக்கு உணவளித்த நன்றிகடனுக்கு அங்குள்ள போலீசாரின் காலடியில் விசுவாசமிகுந்த ஊழியனாக மாறி போனதாக கூறப்படுகின்றது.

சென்டிரலில் இருந்து புறப்படும் ரெயில்களில் பயணிகள் எவராவது வாசலில் அமர்ந்து பயணித்தால் போதும் அவர்களை கடிப்பது போல பயமுறுத்தியே உள்ளே போக வைத்து விடுவாராம் இந்த டைகர்.

சிலர் டைகர் பார்க்கும் இந்த சின்சியர் டியூட்டியை வீடியோ எடுத்து வைரலாக்கினாலும், எப்போதும் போல ரெயில் நிலையத்தில் பயணிகளுக்கு காவலனாக வலம் வருகிறது டைகர் . சில தினங்களுக்கு முன்பு இரவு பணியில் இருந்த போலீஸ்காரர் ஒருவர் சந்தேகத்துக்கிடமான ஆசாமி ஒருவனை பிடித்து வந்து விசாரித்தார். அவன் பல்வேறு இடங்களில் தங்க சங்கிலி பறிப்பு வழக்கில் தொடர்புடையவன் என்பது தெரியவந்த நிலையில், காவலரின் கையை தட்டி விட்டு ஓட்டம் பிடித்தான்.

அடுத்த நொடியே அருகில் படுத்துக்கிடந்த டைகர் பாய்ந்து சென்று காவலரிடம் தப்பிய களவானியை கவ்விப்பிடித்தது. உடன் ஓடிச்சென்ற காவலர், அவனது சட்டையை பிடித்து இழுத்து வந்தார். காவல் நிலையம் வரும் வரை அவனது பேண்டை கவ்விப்பிடித்த படியே வந்தது டைகர்..!

இதே போல காவலுக்கு கெட்டிக்காரணாய் ரெயில்வே போலீசாருக்கு விசுவாசமிக்க ஊழியனாய் வலம் வருகின்றது டைகர்.! அதனால் தான் ரெயில் நிலையத்தில் சும்மா சுற்றித்திரியும் மற்ற தெரு நாய்களை எல்லாம் விரட்டி விரட்டி பிடித்துச்சென்ற மாநகராட்சி ஊழியர்கள் கூட டைகரை மட்டும் விட்டுச்சென்றதாக அங்குள்ள காவலர்கள் தெரிவித்தனர்.