தமிழ் திரையுலகில் தொடர் தோல்விகளால் துவண்டு போன நடிகை நயன்தாரா தன்னை இனி யாரும் லேடி சூப்பர் ஸ்டார் என்று அழைக்க வேண்டாம் என்று அறிக்கை விட்டுள்ளார். ரசிகர்களிடம் கற்ற பாடங்களால் பட்டங்களை உதறும் நடிகர்- நடிகைகளின் பின்னணி குறித்து விவரிக்கின்றது இந்த செய்தித்தொகுப்பு...

சூப்பர் ஸ்டார், லிட்டில் சூப்பர் ஸ்டார், யங் சூப்பர் ஸ்டார், இளைய சூப்பர் ஸ்டார், வரிசையில் தனக்குத்தானே லேடி சூப்பர் ஸ்டார் என்று தனது படத்தில் போட்டுக் கொண்டவர் நடிகை நயன்தாரா...

மாயா, டோரா, அறம், கோலமாவு கோகிலா, இமைக்கா நொடிகள், மூக்குத்தி அம்மன் என கதாநாயகிகளுக்கு முக்கியத்துவம் வாய்ந்த கதாபாத்திரங்களை தேர்ந்தெடுத்து நடித்து அதில் குறிப்பிடத்தக்க வெற்றியும் கண்டவர் நடிகை நயன்தாரா.

இதனால் தனது படங்களில் அடுத்தடுத்த வெற்றியை கொண்டாடும் விதமாக டைட்டில் கார்டில் லேடி சூப்பர் ஸ்டார் என்று போட்டுக் கொள்வதை வழக்கமாக்கினார்.

50 ஆண்டு கால சூப்பர் ஸ்டார் ரஜினிகாந்த் உடன் நடித்த அண்ணாத்த படத்தின் டைட்டில் கார்டில் கூட நயன்தாராவின் பெயர் லேடிஸ் சூப்பர் ஸ்டார் என்றே இடம் பெற்றது.

குறிப்பாக விக்னேஷ் சிவனை காதலித்த காலத்தில் இருந்து, அவரது அறிவுறுத்தலின் பேரிலே திரைப்படங்களில் லேடி சூப்பர் ஸ்டார் என்று நயன்தாராவுக்கு பட்டம் போடப்பட்டதாக கூறப்படுகிறது.

இந்த நிலையில் நயன்தாரா நடிப்பில் வெளியான ஐரா, நெற்றிக்கண், அன்னபூரணி உள்ளிட்ட படங்கள் அடுத்தடுத்து படுதோல்வியை சந்தித்தது

நெட்பிலிக்சுக்காக தான் கேட்ட நானும் ரவுடி தான் பட கிளிப்பிங் கொடுக்கவில்லை என்று நடிகர் தனுசுக்கு எதிராக அறிக்கை வெளியிட்டு ரசிகர்களின் கடும் விமர்சனத்திற்கு உள்ளானார் நயன்தாரா

அண்மையில் நிகழ்ச்சி ஒன்றில் கலந்து கொண்ட நயன்தாராவை அவர் சாதாரண மனிதர் அல்ல என்று ஒருவர் புகழ்ந்த சம்பவத்திற்கு பிறகு சமூக வலைதளங்களில் நயன்தாராவை ரசிகர்கள் இன்னும் கடுமையாக விமர்சித்தனர்

இந்த நிலையில் தன்னை யாரும் லேடி சூப்பர் ஸ்டார் என்று கூற வேண்டாம் என அறிக்கை ஒன்றை வெளியிடும் நிலைக்கு இறங்கி வந்துள்ளார் நயன்தாரா.

இதற்கு முன்பாக அல்டிமேட் ஸ்டார் அஜித், உலக நாயகன் கமல்ஹாசன், ஆகியோர் புகழின் உச்சியில் இருக்கும் போதே தங்கள் பட்டங்களை துறந்தனர்.

ஆனால் அடுத்தடுத்த தோல்விகளால் புரட்சித் தளபதி விஷால், சின்ன தளபதி பரத், மக்கள் சூப்பர் ஸ்டார் ராகவா லாரன்ஸ், ஆகியோர் தங்கள் படங்களில் பட்டங்கள் போட்டுக் கொள்வதை நிறுத்திக் கொண்டது குறிப்பிடத்தக்கது.