தடையற்ற வர்த்தக ஒப்பந்தம் மூலம் இந்தியாவிலிருந்து பிரிட்டனுக்கு ஏற்றுமதி செய்யப்படும் 99 சதவீத பொருட்களுக்கு பிரிட்டனில் எவ்வித இறக்குமதி வரியும் விதிக்கப்படாது. இதன் மூலம் பிரிட்டனில் இந்திய பொருட்களின் விலை குறையும். மற்ற நாடுகளுடன் ஒப்பிடும் போது இந்திய பொருட்களை அதிகளவில் வாங்கி விற்க பிரிட்டனை சேர்ந்த நிறுவனங்கள் ஆர்வம் காட்டும்.

இந்தியாவில் இருந்து பொறியியல் சார்ந்த பொருட்கள், என்ஜின்கள், ஆடைகள், நகைகள், காலணிகள் உள்ளிட்ட தோல் பொருட்கள், விளையாட்டு பொருட்கள், இயற்கை ரசாயனங்கள், பதப்படுத்தப்பட்ட இறால் வகைகள் உள்ளிட்டவற்றை அதிகளவில் பிரிட்டனுக்கு ஏற்றுமதி செய்ய முடியும். பிளாஸ்டிக், கனிமம், ரப்பர், காகிதம், செராமிக், கண்ணாடி போன்றவற்றுக்கும் முழுமையான வரி விலக்கு கிடைக்கும். தகவல் தொழில்நுட்பம், நிதி, கல்வி உள்ளிட்ட இந்திய சேவைத் துறைகளும் பலனடையும்.

மறுபுறம், பிரிட்டனில் இருந்து இறக்குமதி செய்யப்படும் மருத்துவ கருவிகள், நவீன இயந்திரங்கள், விஸ்கி, ஜின் உள்ளிட்ட மதுபானங்கள், அழகு சாதன பொருட்கள், மின்னணு இயந்திரங்கள், சாக்லெட், பிஸ்கட்டுகள் போன்ற பல்வேறு பொருட்களுக்கான வரியை குறைக்க இந்தியா முடிவு செய்துள்ளது. வாகனங்கள் மற்றும் உதிரி பாகங்ளுக்கான இறக்குமதி வரி 100-இலிருந்து 10 சதவீதமாக குறையும் என்பதால் பிரிட்டனில் இருந்து இறக்குமதி செய்யப்படும் வாகனங்களின் விலையும் குறையும் என நிபுணர்கள் தெரிவித்துள்ளனர்.