தமிழ்நாட்டில் 3ஆம் வகுப்பு பயிலும் 8.6 சதவீத மாணவர்களுக்கு எழுத்துகளை படிக்கத் தெரியவில்லை என்று மத்திய நிதி அமைச்சர் நிர்மலா சீதாராமன் தெரிவித்துள்ளார். மக்களவையில் பேசிய அவர், மாணவர்களுக்கு ஏன் படிக்கத் தெரியவில்லை என்பதற்கு திமுக எம்பிக்கள் பதில் அளிக்க வேண்டும் என்று கூறினார்.

மத்திய அரசுக்கு ஒரு ரூபாய் கொடுத்தால் தமிழ்நாட்டிற்கு 29 பைசா மட்டுமே திரும்ப வருவதாக தமிழக அரசு கூறுவதாக சுட்டிக்காட்டிய நிர்மலா சீதாராமன், சென்னை, கோவை அதிக வருமானம் கொடுக்கிறது என்பதற்காக பெரம்பலூர், கோவில்பட்டிக்கு தமிழக அரசு பணம் கொடுப்பதில்லையா என்று வினவினார்.

பெண்ணுரிமை குறித்து பேசும் திமுகவினர்தான் சட்டப்பேரவையில் ஜெயலலிதாவின் புடவையை பிடித்து இழுத்தனர் என்று கூறிய நிதி அமைச்சர், இதுதான் திமுகவின் பண்பாடா? என்றும் கேள்வி எழுப்பினார்.

தமிழ்நாட்டு மக்களை அநாகரீகமானவர்கள் என்று மத்திய அமைச்சர் தர்மேந்திர பிரதான் கூறவில்லை என்று குறிப்பிட்ட நிர்மலா சீதாராமன், தமிழை காட்டு மிராண்டி மொழி என கூறிய பெரியார் புகைப்படத்தை திமுகவினர் வணங்குவதாக விமர்சித்தார்.