அந்த மணப்பெண் அழகிய அலங்காரங்களுடன் அன்னநடைபோட்டு மணமேடையை நோக்கி வர, மணமேடையில் குர்தா அணிந்த மணமகன் “கண்கள் இரண்டால் உன் கண்கள் இரண்டால் என்னை கட்டி இழுத்தாய்...” என புன்னகைத்து ஓரக்கண்ணால் ரசித்தபடி காத்திருக்கிறார். அப்போது, கோட் சூட் போட்ட நபர், மணமகளின் கரத்தை மெல்ல பிடித்து, செல்லமாய் மணமேடையில் ஏற்றுகிறார். மணமகளோ புன்சிரிப்பும் வெட்கமுமாய் மணமேடையில் ஏற ஆரம்பிக்கிறார்.

கோட் சூட் போட்ட நபர் மணப்பெண்ணின் சகோதரராக இருக்கலாம். மணப்பெண்ணை மேடையில் ஏற்றி, மணமகனிடம் சென்று, “என் கண்ணையே உன்கிட்ட ஒப்படைக்கிறேன். அதுல ஆனந்த கண்ணீரைத்தான், நான் எப்பவும் பார்க்கணும்” என பாசமலர் சிவாஜி கணேசனைப் போல, தனது சகோதரியை மணமகனிடம் ஒப்படைக்கப்போகிறாரோ என காத்துக்கொண்டிருக்கும்போதுதான், ஒரு ஸ்மால் டிவிஸ்ட்!

கோட் சூட் அணிந்தபடி, மணப்பெண்ணை கைப்பிடித்து செல்லமாய் மேடை ஏற்றியவர், பெண்ணின் சகோதரன் இல்லையாம். மணமேடையில் குர்தாவுடன் ஓரக்கண்ணால் புன்னகைத்தபடி காத்துக்கொண்டிருந்த மணமகனின் சகோதரர் தானாம். எந்திரன் படத்து ‘என்னடி இது?’ மீம்ஸ் போல் ஷாக் ஆகிப் பார்த்துக்கொண்டிருந்தால் அடுத்த ட்விஸ்ட், அடிவயிற்றில் ஐஸ்கட்டியை வைத்ததுபோல் ஜிலீரிடவைக்கிறது.

மணப்பெண்ணை மேடைக்கு கைப்பிடித்து அழைத்து சென்றவர், மேடையில் குர்தாவுடன் நின்றிருந்த மணமகனின் சகோதரர் மட்டுமல்ல. அவரும் இன்னொரு மணமகன் தானாம். “என்னங்கயா எனக்கு ஒண்ணுமே புரியலையா...” என்கிற ‘மாமன்னன்’ பட வடிவேலு ரேஞ்சுக்கு மண்டையை பிய்த்துகொண்டு பார்த்துக்கொண்டிருக்க, ஊரார் கூடி வாழ்த்த, நாட்டுப்புற இசை முழங்க, நடன கொண்டாட்டங்களுடன் அண்ணன் - தம்பிகளான மணமகன்கள் ஒரே பெண்ணான சுனிதா செளகானை கரம்பிடித்திருக்கிறார்கள்.

இமாச்சலப் பிரதேசத்தின் ஷில்லை என்கிற கிராமத்தில் நடைபெற்ற பாரம்பரிய திருமண விழாவில், பிரதீப் மற்றும் கபில் நேகி என்ற இரண்டு சகோதரர்களை ஒரு பெண் ஒரே மணமேடையில் மணந்துள்ளதுதான், சமூக வலைதளங்களில் செம்ம வைரல் ஆகிவருகிறது. மூன்று நாள்கள் கொண்டாட்டங்களில் உள்ளூர் நாட்டுப்புற பாடல்கள், நடனங்கள் இடம்பெற்றன, நூற்றுக்கணக்கான விருந்தினர்கள் கலந்து கொண்டனர்.

நீண்டகால பாரம்பரியத்தின் கீழ் இந்த ‘Polyandry’ நடைபெற்றதாக கூறப்படுகிறது. ஒரு பெண் ஒரே நேரத்தில் ஒன்றுக்கு மேற்பட்ட கணவர்களை மணப்பது ‘பாலியண்ட்ரி’ திருமணம் என அழைக்கப்படுகிறது. அதுவே, ஒரு ஆண் ஒரே நேரத்தில் ஒன்றுக்குமேற்பட்ட பெண்களை திருமணம் செய்துகொள்வது “polygyny” என அழைக்கப்படுகிறது.

ஒரு பெண் பல ஆண்களை, பொதுவாக சகோதரர்களை மணக்கும் வழக்கம் - ஒரு காலத்தில் ஹட்டி பழங்குடியினரிடையே இருந்தது. ஜோடிதாரா அல்லது ஜஜ்தா என்று அழைக்கப்படும் இந்த வகையான திருமணம் இமாச்சலப் பிரதேசத்தில் சட்டப்படி அங்கீகரிக்கப்பட்டதாகும். “பல வாரிசுதாரர்களிடையே மூதாதையர் நிலத்தைப் பிரிப்பதைத் தடுக்க பாலியண்ட்ரி முறை உதவியது. மேலும் சகோதரர்களிடையே ஒற்றுமையை வளர்க்கிறது மற்றும் கூட்டுக் குடும்ப முறையைப் பாதுகாக்கிறது” என சுட்டிக்காட்டுகிறார், கேந்திரிய ஹட்டி சமிதியின் பொதுச் செயலாளர் குந்தன் சிங் சாஸ்திரி.

'ஜோடிதார் சட்டத்தின்' கீழ் இமாச்சலப் பிரதேச உயர் நீதிமன்றத்தால் சட்டப்பூர்வமாக அங்கீகரிக்கப்பட்டுள்ள இத்திருமணத்தை, இப்போதெல்லாம் பல சமூகங்கள் ரகசியமாகத்தான் நடத்தி வைக்கின்றன. காரணம், கிராமவாசிகள் கல்வி கற்று வேலைக்காக நகரங்களுக்குச் செல்லும்போது, இந்த முறை மாற ஆரம்பித்துவிட்டது, எனவும் கூறப்படுகிறது.

இந்தநிலையில்தான், ஊர்க்கூடி, நாட்டுப்புற இசை முழங்க மூன்று நாட்களுக்குக்கு மேலாக பாரம்பரிய பாலியாண்ட்ரி திருமணம் கோலாகலமாக கொண்டாடப்பட்டதால் இணையத்தில் வைரல் ஆகி வருகிறது.