சமூக வலைதளங்களில் 'TVK அக்கா' என செல்லமாக அழைக்கப்பட்டவர் கோவையை சேர்ந்த 20 வயதான இளம் அரசியல்வாதி வைஷ்ணவி.

விஜய் கட்சி தொடங்கியதும் தன்னை விஜயின் தமிழக வெற்றி கழகத்தில் இணைத்து கொண்ட வைஷ்ணவி, சில மாதங்களுக்கு அறிக்கை ஒன்றை வெளியிட்டு த.வெ.கவில் இருந்து வெளியேறினார்.

அந்த அறிக்கையில் தான் கட்சியில் வளரக்கூடாது என்பதற்காக கட்சியில் உள்ள சிலர் மனஉளைச்சலுக்கு ஆளாக்கியதாகவும் குறிப்பிட்டிருந்தார்

இதனை தொடர்ந்து, வைஷ்ணவியின் தாய் திமுகவில் உள்ள நிலையில், கடந்த ஜூன்மாதம் முன்னாள் அமைச்சர் செந்தில் பாலாஜி முன்னிலையில் வைஷ்ணவியும் தன்னை திமுகவில் இணைத்து கொண்டார்.

இந்த நிலையில், கோவை போலீஸ் கமிஷனர் அலுவலகம் சென்ற வைஷ்ணவி, த.வெ.க தலைவர் விஜய் மீதும் அவரது தொண்டர்கள் மீதும் பரபரப்பு புகார் ஒன்றை அளித்துள்ளார்.

த.வெ.கவில் இருந்து வெளியேறியதில் இருந்தே த.வெ.க தொண்டர்கள், சமூக வலைதள பக்கங்களில் தன்னை ஆபாசமாக சித்தரித்தும், புகைப்படங்களை மார்பிங் செய்தும், தகாத வார்த்தைகளால் கமெண்ட் செய்தும் வருவதாக வைஷ்ணவி தெரிவித்துள்ளார்.

விர்சுவல் வாரியர்ஸ் செய்த சேட்டைகளை எல்லாம் த.வெ.க தலைவர் விஜய் கண்டித்து அறிக்கை விடுவார் என எதிர்பார்த்தேன், ஆனால் அப்படி அவர் எதுவும் செய்யவில்லை, அதனால் த.வெ.க தலைவர் விஜய் மீதும் புகார் அளித்துள்ளதாக வைஷ்ணவி பரபரப்பை கிளப்பியுள்ளார்.

தொண்டர்கள் செய்யும் தவறுக்கு விஜய் மீது ஏன் புகார்? என செய்தியாளர்கள் கேள்வி எழுப்பினர். அதற்கு , த.வெ.க வை ஆதரிக்கும் ஒவ்வொருவரும் தங்களது விர்சுவல் வாரியர்ஸ் தான் என விஜய் கூறியதாகவும், இதுபோன்ற நாகரிகமற்ற முறையில் நடந்து கொள்ளும் விர்சுவல் வாரியர்ஸை கண்டித்து ஏன்? விஜய் அறிக்கை வெளியிடவில்லை என்றும் கேள்வி எழுப்பியுள்ளார்.

மேலும் தான் இந்த புகாரை விளம்பரம் செய்துகொள்வதற்காக செய்யவில்லை என்றும் வைஷ்ணவி குறிப்பிட்டுள்ளார்.

அரசியல் களத்தில் நாகரீகமான முறையில் விமர்சனத்தை முன் வைக்கலாம், ஆனால் பதில் தெரியவில்லை என்பதற்காக அநாகரீகமான முறையில் விமர்சிப்பது தவறு என்றும் வைஷ்ணவி குறிப்பிட்டுள்ளார்.

வைஷ்ணவி அளித்த புகாரில், தன்னுடைய புகைப்படங்களை மிக மோசமாக சித்தரித்து மீம்ஸ்களாகவும், வீடியோவாகவும் சமூக வலைதளங்களில் பரப்பி வருகிறார்கள்.

இது தன்னை போன்ற சிறுவயதிலேயே அரசியலில் பயணிக்கும் பெண்களை அவமதிக்கும் செயலாக உள்ளது. எனவே தமிழக வெற்றி கழக தலைவர் விஜய் மீதும் அவர்கள் கட்சி தொண்டர்கள் மீதும் நடவடிக்கை எடுக்குமாறு பணிவுடன் கேட்டுக்கொள்கிறேன் என்று குறிப்பிட்டுள்ளார்.

மாநகர காவல் துணை ஆணையர் சுகாசினியிடம் புகாரை அளித்த நிலையில், இது குறித்து போலீசார் விசாரிப்பதாக உறுதி அளித்துள்ளதாக வைஷ்ணவி தெரிவித்துள்ளார்.