கரூரில், அமைச்சர் செந்தில்பாலாஜிக்கு நெருக்கமானவர்கள் எனக் கூறப்படும் மூவரின் வீடுகள் உள்ளிட்ட இடங்களில், கேரளாவில் இருந்து வந்துள்ள அமலாக்கத்துறை அதிகாரிகள் 4 குழுக்களாக பிரிந்து சோதனை மேற்கொண்டுள்ளனர்.

கரூர் ராயனூரில் உள்ள கொங்கு மெஸ் சுப்ரமணியின் வீடு, கரூர் காந்திபுரம் 80 அடி சாலை பகுதியில், அடுக்குமாடி குடியிருப்பு ஒன்றில் வசிக்கும் அரசு ஒப்பந்ததாரர் எம்.சி.எஸ்.சங்கர் ஆனந்தின் வீடு ஆகிய இடங்களில் அமலாக்கத்துறையினர் சோதனை மேற்கொண்டுள்ளனர். கரூர் காயத்ரி நகரில் உள்ள சக்தி மெஸ் உரிமையாளர்களில் ஒருவரான கார்த்தியின் வீட்டில் ரெய்டு நடைபெறுகிறது.

இந்நிலையில், குளித்தலை அருகே மாயனூரில், அரசு ஒப்பந்ததாரர் எம்.சி.எஸ்.சங்கர் ஆனந்தின் தாய், தந்தை வசிக்கும் வீட்டிற்கு 2 கார்கள் அமலாக்கத்துறை அதிகாரிகள் சோதனையிட வந்துள்ளனர். வீட்டில் யாரும் இல்லாததால் ரெய்டுக்காக வந்த அதிகாரிகள் காலை 8.15 மணி முதல் காத்திருக்கின்றனர். சம்பந்தப்பட்டவர்களுக்கு தகவல் அளித்துள்ள ED அதிகாரிகள், உறவினர் அல்லது நண்பர் முன்னிலையில் வீட்டின் பூட்டை உடைத்து சோதனையிடவும் திட்டமிட்டு வருவதாக கூறப்படுகிறது.