கன்னி தீவும்..! நித்தியும்..! கடல்லே இல்லையாம்…! ஈகுவடார் நாடு மறுப்பு..!

0 838

நித்தியானந்தா ஈகுவடார் நாட்டில் எந்த ஒரு இடத்தையோ, அல்லது தீவுகளையோ விலைக்கு வாங்க வில்லை என்று மறுத்துள்ள ஈகுவடார்  நாட்டு தூதரகம், சர்வதேச அகதியாக குடியேறுவதற்கு அனுமதி கேட்ட நித்தியின் கோரிக்கையை ஏற்காததால் தங்கள் நாட்டை விட்டு அவர் வெளியேறி விட்டதாக அறிவித்துள்ளது.

திருவண்ணாமலையை பூர்வீகமாக கொண்ட நித்யானந்தாவுக்கு உலகம் முழுவதும் 17 நாடுகளில் 108 ஆசிரமங்கள் உள்ள நிலையில் குஜராத் மாநிலம் அகமதபாத் ஆசிரமத்தில் பாலியல் பலாத்கார புகார் எழுந்தது.

சிறுமிகளை ஆசிரமத்தில் சட்டவிரோதமாக அடைத்து வைத்து கொடுமைப்படுத்துதல், கடத்தல் உள்ளிட்ட வழக்கில் தேடப்படும் நித்தியானந்தாவை பிடிக்க இண்டர்போல் உதவியை அகமதாபாத் காவல் துறையினர் நாடியுள்ளனர்.

நித்தி தனது சிஸ்ய லேடிகளுடன் தெற்கு அமெரிக்காவில் உள்ள ஈகுவடார் நாட்டில் ஒரு தீவை விலைக்கு வாங்கி, அதற்கு கைலாசா என்று பெயரிட்டு தனி நாடாக தொடங்கி இருப்பதாக நித்தியின் www.kailasaa.org என்ற இணையத்தில் அறிவித்திருந்தார்

அதில் பாஸ்போர்ட், தனி கொடியுடன் 11 விதமான பாலியல் செய்கைகளுக்கு தனது தீவில் சட்ட அங்கீகாரம் அளித்துள்ளதை சுட்டிக்காட்டி தனிநாடாக அறிவிக்க கோரி ஐ.நா.சபைக்கு கடிதம் ஒன்றையும் நித்தி எழுதியுள்ளதாக இணையத்தில் தெரிவிக்கப்படிருந்தது.

ஈகுவடார் நாட்டின் தனி தீவை, நித்தி, கன்னி தீவாக மாற்ற முயற்சிக்கும் தகவல்கள் தொடர்ந்து செய்திகளாக வெளியானதால், சர்வதேச அளவில் முக்கியத்துவம் பெற்றதை தொடர்ந்து மிரண்டு போன இந்தியாவுக்கான ஈகுவடார் தூதரகம் மறுப்பு அறிவிப்பு ஒன்றை வெளியிட்டுள்ளது.

அதில், சுயமாக தன்னை தானே குருவாக அறிவித்துக் கொண்ட நித்தியானந்தா ஈகுவடார் நாட்டில் எந்த இடத்தையோ, அல்லது தீவுகளையோ வாங்க வில்லை என்று சுட்டிக்காட்டியுள்ளனர்.

மேலும், சர்வதேச அகதிகள் குடியேற்ற விதியின் கீழ் நித்தியானந்தா அனுமதி கேட்டதாகவும், அதனை ஈகுவடார் அரசு ஏற்கவில்லை என்பதால் ஈகுவடார் நாட்டிலிருந்து நித்தியானந்தா வெளியேறிவிட்டதாக தெரிவிக்கப்பட்டுள்ளது.

ஈகுவடார் நாட்டில் தனித் தீவு வாங்கியிருப்பதாக வந்த அத்தனை செய்திகளுக்கும், நித்தியானந்தா பீடத்தின் சார்பில் இயங்கிவரும் KAILASAA.ORG என்ற இணைய நிறுவனமும் அவரது பீடத்தில் பணிப்புரியும் அலுவலர்களே பொறுப்பு என்று ஈகுவடார் தூதரகம் கூறியுள்ளது.

எனவே, இனிவரும் நாள்களில் நித்தியானந்தா ஈகுடவார் நாட்டில் இருப்பதாக எந்த செய்திகளையும் வெளியிட வேண்டாம் என்றும் இந்தியாவுக்கான அந்நாட்டு அரசின் தூதரகம் அறிக்கை ஒன்றை வெளியிட்டு கன்னிதீவு கதைக்கு முற்றுபுள்ளி வைத்துள்ளது

இந்த நிலையில் சிஷ்ய அடிபொடிகளுடன் கண்டம் விட்டு கண்டம் தாவியுள்ள நித்தி அடைக்கலம் தேடி அகதியாக வடக்கு அமெரிக்காவில் உள்ள ஹைதி தீவில் மறைந்து இருக்கலாம் என்று கூறப்படுகிறது.

இதற்கிடையே திருவண்ணாமலையில் சாதாரணமாக இருந்த தன்னை ஊர் ஊராக அடித்து துரத்தியதால், கைலாசா என்று தனி நாடு அமைக்கும் அளவிற்கு வளர்ந்திருப்பதாக நித்தி முழங்கியுள்ளார்.

SHARE
RELATED POSTS
Click to comment
LEAVE COMMENT
SUBMIT

Comments