தமிழ்நாட்டிற்கான PM ஸ்ரீ திட்ட நிதி ஒதுக்கீடு தொடர்பாக, திமுக தரப்பில், கேள்வி எழுப்ப, மத்திய கல்வித்துறை அமைச்சர் தர்மேந்திர பிரதான், தேதி வாரியாக நடைபெற்ற அனைத்தையும் சுட்டிக்காட்டி, காட்டமாக பதிலடி கொடுத்தார். மக்களவையில் பேசிய திமுக எம்.பி தமிழச்சி தங்க பாண்டியன், புதிய தேசிய கல்வி கொள்கையை ஏற்றால் தான் தமிழ்நாட்டிற்கான கல்வி நிதி 2 ஆயிரம் கோடி ரூபாய் நிதி ஒதுக்கப்படும் என்பது, மாநில உரிமைக்கும், கூட்டாட்சி தத்துவத்திற்கும் எதிரானது எனக் கூறினார்.

தமிழ்நாட்டிற்கான கல்வி நிதியை வேறு மாநிலத்திற்கு மாற்றிவிட்டிருப்பது, மத்திய அரசின் பழிவாங்கும் நடவடிக்கை எனக் குற்றம்சாட்டினார்.

இதற்கு பதிலளித்த மத்திய கல்வித்துறை அமைச்சர் தர்மேந்திர பிரதான், PM ஸ்ரீ திட்டத்தை, கடந்தாண்டு இதே மார்ச் மாதம், புரிந்துணர்வு ஒப்பந்தத்தை ஏற்பதாக கூறிவிட்டு, தற்போது, தமிழ்நாடு அரசு U TURN அடித்துவிட்டதாக குற்றம்சாட்டினார். இன்று கேள்வி எழுப்பிய எம்.பி.யும், தமிழக பள்ளிக்கல்வித்துறை அமைச்சர் உள்ளிட்டோர் என்னை சந்தித்து PM ஸ்ரீ திட்டத்தை ஏற்பதாக கூறியிருந்தார்கள் என்றும் தர்மேந்திர பிரதான் தெரிவித்தார்.

PAN India போன்று நாடு முழுவதும் சர்வதேச தரத்தில் கல்வி கிடைக்கும் வகையில், முன்னெடுக்கப்படும் PM ஸ்ரீ திட்டத்தில், அரசியல் செய்து, தமிழக மாணவர்களுக்கு, திமுக அரசு அநீதி இழைப்பதாக, தர்மேந்திர பிரதான் குற்றம்சாட்டினார். PM ஸ்ரீ திட்ட விவகாரத்தில், தமிழகத்தை ஆளும் தரப்பு அநாகரீகமான முறையில் நடந்து கொள்வதாக, தர்மேந்திர பிரதான் தெரிவித்தார்.

PM ஸ்ரீ திட்டத்தை, தமிழ்நாடு முதலமைச்சர் மு.க.ஸ்டாலின் ஏற்க தயாராக இருந்தபோது, அதை தடுத்த சூப்பர் முதலமைச்சர் யார்? என்பதை சகோதரி கனிமொழி தான் தெரிவிக்க வேண்டும் என, தர்மேந்திர பிரதான் கூறினார்.

புதிய கல்விக்கொள்கையை பாஜக ஆளாதக மாநிலங்களும், காங்கிரஸ் ஆளுநம் கர்நாடகா போன்ற மாநிலங்களும் ஏற்றுக் கொண்டுள்ளதாகவும் மத்திய அமைச்சர் பிரதான் தெரிவித்தார். தர்மேந்திர பிரதானின் கருத்துக்கு திமுக எம்.பி.க்கள் எதிர்ப்புத் தெரிவித்து அமளியில் ஈடுபட்டனர்.