பாராமதி விமான விபத்தில் உயிரிழந்த துணை முதல்வர் அஜித் பவார், மராட்டிய அரசியல்வாதிகளாலும், மராத்தியர்களாலும், செல்லமாக "தாதா" என்ற அடைமொழியுடன் அழைக்கப்பட்டவர்.

தேசியவாத காங்கிரஸ் கட்சி தலைவர் சரத்பவாரின், மூத்த சகோதரர் அனந்த்ராவ் பவாரின் மகன் அஜித் பவார்... தந்தை புகழ்பெற்ற மும்பை ராஜ்கமல் ஸ்டுடியோவில் பணியாற்றியதால், சினிமாவில் நடிக்க முதலில் அஜித் பவார் முயற்சித்துள்ளார்.

தந்தையின் மறைவைத் தொடர்ந்து, படிப்பை பாதியில் விட்டுவிட்டு சித்தப்பா சரத் பவாருடன் இணைந்து அரசியலில் கோலோச்ச தொடங்கினார்.

1991ல் தான் போட்டியிட்டு வென்ற பாராமதி எம்.பி. தொகுதியை சித்தப்பா சரத்பவார் மத்திய அமைச்சரானதால், அவருக்கு விட்டுக்கொடுத்துவிட்டு, அதே ஆண்டில், பாரமதி சட்டமன்ற தொகுதியில் நின்று வென்று எம்எல்ஏ ஆனார்.

அன்று முதல் 2024ஆம் ஆண்டு வரை, பாரமதி தொகுதியிலிருந்து தொடர்ந்து 8 முறை தொடர்ச்சியாக எம்எல்ஏவாக தேர்ந்தெடுக்கப்பட்டவர் அஜித் பவார்...

பிருத்விராஜ் சவான், உத்தவ் தாக்ரே, தேவேந்திர பட்னாவிஸ், ஏக்நாத் ஷிண்டே, மீண்டும் தேவேந்திர பட்னாவிஸ் என 2010 முதல் தற்போது வரை, 6 முறை துணை முதலைச்சராக பதவி வகித்துள்ளார்.

சரத்பவாருக்கு பிறகு, தேசியவாத காங்கிரஸ் கட்சியின் தலைவராக அஜித் பவார் பதவியேற்பார் என எதிர்பார்க்கப்பட்ட நிலையில், தனது மகள் சுப்ரியா சுலேவை தலைவராக அறிவித்ததால், கட்சியை உடைத்து, NCP பெயரில் அங்கீகாரம் பெற்று தலைவராக உருமாறினார்.

தனது ஆதரவு எம்எல்ஏக்களுடன் பாஜக கூட்டணிக்கு ஆதரவு தெரிவித்து, மீண்டும் மராட்டிய அரசியலில் தவிர்க்க முடியாத சக்தியாக அஜித் பவார் மாறிய நிலையில், விமான விபத்தில், அகால மரணம் அடைந்ததால், அவரது ஆதரவாளர்கள் சோகத்தில் மூழ்கியுள்ளனர்.