தமிழ்நாடு சட்டப்பேரவையில், நடப்பாண்டுக்கான முதல் கூட்டத்தொடரில், ஆளுநர் உரை மீதான விவாதங்களுக்கு பதிலளித்து பேசிய முதலமைச்சர் மு.க.ஸ்டாலின், 5 அறிவிப்புகளை வெளியிட்டார்.

திமுக ஆட்சியில் வழங்கப்படும் மகளிர் உரிமை தொகை மூலம், ஒவ்வொருவருக்கும், தலா 29 ஆயிரம் ரூபாய் கிடைத்திருப்பதாக முதலமைச்சர் கூறினார். தாம் பொறுப்பேற்று 1724 நாட்கள் ஆவதாகவும், 15,117 கோப்புகளில் கையெழுத்திட்டிருப்பதாகவும், முதல்வர் தெரிவித்தார்.

தொடர்ந்து 3 ஆண்டுகளாக, ஆளுநர் தனது உரையை புறக்கணிப்பது என்பது, மக்களாட்சிக்கு விடப்பட்ட சவால் என்று கூறினார். பொறுப்புமிக்க பதவியை, ஆளுநர் கேவலப்படுத்துவதாக முதலமைச்சர் தெரிவித்தார். தேச ஒருமைப்பாட்டில் யாருக்கும் தாங்கள் சளைத்தவர்கள் இல்லை என்று கூறிய முதலமைச்சர், தேசப்பக்தி பாடம் எடுப்பவர்கள் யாரும், தேசத்திற்கான போராட்டங்களில் பங்கேற்றதில்லை என்று தெரிவித்தார்.

தமிழ்நாடு இரட்டை இலக்க பொருளாதார வளர்ச்சி அடைந்திருப்பதாகவும், அதில் சந்தேகம் இருந்தால், அதை வெளியிட்ட மத்திய அரசிடம் தான் ஆளுநர் கேள்வி எழுப்ப வேண்டும் என முதலமைச்சர் தெரிவித்தார். என்னை சீண்டி பார்ப்பவர்கள் மகிழ்ச்சி அடையலாம்; ஆனால், அது தன்னை பாதிக்காது என்று கூறிய முதலமைச்சர், சோதனைகளை வென்று வளர்ந்தவன் நான் என்று குறிப்பிட்டார்.

தனது உரையின் இறுதியில், மேலும் 1 லட்சம் வீடுகள் கடித்தரப்படும், 2200 கிலோ மீட்டர் தூர கிராமச் சாலை மேம்படுத்தப்படும், கூடுதலாக 1.80 லட்சம் பேருக்கு மாதாந்திர ஓய்வூதியம் வழங்கப்படும், சத்துணவு, மற்றும் அங்கன்வாடி ஊழியர்களுக்கான ஓய்வூதியம் 3 ஆயிரத்து 400ஆக உயர்த்தி வழங்கப்படும், பகுதிநேர ஆசிரியர்கள் சிறப்பு மதிப்பெண் அடிப்படையில் பணி நிரந்தரம் செய்யப்படுவார்கள் என்றும் முதலமைச்சர் அறிவித்தார்.

தனது பதிலுரையின் இறுதியில், திமுக தான் மீண்டும் ஆட்சியமைக்கும், வெல்லும் என்று முதலமைச்சர் தெரிவித்தார்.