சோசியல் மீடியாவில் ஒரு பென்குயின் நடந்து செல்லும் வீடியோவை பலரும் பதிவிட்டு வருவதும், அந்த பென்குயின் படத்தை மொபைலின் Wallpaper ஆக வைத்தும் ட்ரெண்ட் செய்து வருகின்றனர். அப்படி அந்த பென்குயின் என்ன செய்தது? திடீரென வைரலாக காரணம் என்ன? என்பது குறித்து விளக்குகிறது இந்த செய்தி தொகுப்பு...

பிரபல ஜெர்மன் திரைப்பட இயக்குனர் வெர்னர் ஹெர்சாக், கடந்த 2007 ஆம் ஆண்டு "Antarctica - Encounters at the End of the World" என்கிற ஆவணப்படத்தை எடுக்க ஆரம்பித்தார். அண்டார்டிக்காவில் வாழும் உயிரினங்களை ஆவணப்படமாக எடுக்க வேண்டும் என்ற ஆசையில் அதை செய்தார்.

அண்டார்டிக் கண்டத்தின் கரையோரங்களில் காணப்படும் சிறிய, கருப்பு- வெள்ளை நிறமுடைய அடேலி பென்குயின் கூட்டத்தை வெர்னர் ஹெர்சாக் பார்த்துள்ளார். அப்போது அந்த கூட்டத்தில் இருந்த எல்லா பென்குயின்களும், தங்களை காத்துக் கொள்ள கடல் பகுதியை நோக்கி படையெடுத்துள்ளது.

அப்போது, ஒரு பென்குயின் மட்டும் மற்ற பென்குயின்களுக்கு மாறாக, 70 கிலோ மீட்டர் தொலைவில் உள்ள மலை பகுதியை நோக்கி சென்றுள்ளது. இதனை கவனித்த வெர்னர் ஹெர்சாக் பெரும் அதிர்ச்சி அடைந்துள்ளார். காரணம் வழக்கமாக பென்குயின்களுக்கு என ஒரு தனி சிறப்பு உள்ளது. ஒரு பென்குயினை தொடர்ந்து மற்ற பென்குயின்களும் அதே பாதையில் பயணம் செல்லும். இதனை நாம் பல வீடியோக்களில் பார்த்திருப்போம்.

ஆனால் அந்த ஒரு பென்குயின் மட்டும், தனக்கு சம்மந்தமே இல்லாத மலை பகுதியை நோக்கி, அதுவும் தனியாக சென்றுள்ளது. இதனால் வெர்னர் ஹெர்சாக் உடனே பென்குயின் வழிதவறி செல்வதை உணர்ந்து, அந்த பென்குயினை பிடித்து மற்ற பென்குயின் கூட்டத்தோடு விட்டுள்ளார்.

ஆனாலும் அந்த பென்குயின் மட்டும் அந்த கூட்டத்தில் இருந்து மீண்டும் மீண்டும் விலகி, அது தனி ஒரு பாதையில் மலையை நோக்கி செல்ல ஆரம்பித்தது. இதனை அவர் வீடியோவாகவும் எடுத்துள்ளார்.

அப்படி சென்ற அந்த பென்குயினுக்கு அந்த இடத்தில் உணவு கிடையாது..உயிர் வாழ முடியாது. இறுதியில் அது மரணத்தையே சந்தித்தது. இந்த நிகழ்வு உலகத்தையே குழப்பத்திலும், அதிர்ச்சியிலும் ஆழ்த்தியது.

இந்த வீடியோவை தற்போது பகிர்ந்த சிலர், அந்த பென்குயின் மனச் சோர்வு காரணமாக வாழ்க்கையையே வெறுத்து போய் தான் அப்படி சென்றிருக்கும், அதை போல தான் நானும் தற்போது உள்ளேன் என ஒப்பிட்டு சோகமாக ஸ்டேட்டஸ் வைத்து வருகின்றனர்.

இன்னும் சிலர், அந்த பென்குயினுக்கு காதல் தோல்வி ஏற்பட்டிருக்கும், அது தான் காரணம் என்று சில பாடல்களை பின்னணியில் ஒலிக்கவிட்டு வீடியோ வெளியிட்டு வருகின்றனர்.

அந்த பென்குயினால் மலை உயரத்துக்கு பறக்க முடியாது, இருந்தாலும் நடந்தே மலையின் உயரத்தை அடைய முயற்சி செய்துள்ளது என மாஸ் பிஜிஎம் போட்டு எடிட் செய்தும் வருகின்றனர்.

மேலும், கூட்டத்தில் ஒருவனாய் இல்லாமல், வாழ்வோ, சாவோ துணிச்சலோடு முடிவு எடுத்துள்ளது. அது ஒரு பாடம் என்றெல்லாம் புகழ்ந்து வருவதோடு, அந்த பென்குயின் தனக்கு inspiration என்றெல்லாம் கூறி, அதன் புகைப்படத்தை மொபைலின் Wallpaper ஆகவும் வைத்து ட்ரெண்ட் செய்து வருகின்றனர். இப்படி அந்த பென்குயின் எடுத்த முடிவு பல்வேறு விதமான கதைகளை உருவாக்கி வருகிறது.