நீதிபதியை மத அமைப்புடன் ஒப்பிட்டு நாடாளுமன்றத்தில் பேசிய திமுக எம்பி டி.ஆர்.பாலுவுக்கும், அவர் சார்ந்த கட்சிக்கும் தேவையற்ற பிரச்சனைகள் ஏற்படலாம் என மத்திய அமைச்சர் கிரண் ரிஜிஜூ கடுமையாக எச்சரித்துள்ளார்.

மக்களவை கூடியதும் எழுந்த திமுக எம்பி டி.ஆர்.பாலு, தமிழ்நாட்டில் திருப்பரங்குன்றம் கார்த்திகை தீபத்தை முன்வைத்து மதக்கலவரத்தை ஏற்படுத்த முயற்சி நடைபெறுவது பற்றி விவாதிக்க வேண்டும் என வலியுறுத்தினார்.

தொடர்ந்து பேசிய டி.ஆர்.பாலு, உயர்நீதிமன்ற மதுரை அமர்வை சேர்ந்த நீதிபதி ஒருவர் கொடுத்த தீர்ப்பு என கூறியதற்கு எதிராக பாஜகவினர் முழக்கங்கள் எழுப்பினர். தொடர்ந்து திமுகவினரும் பதில் முழக்கம் எழுப்பியதால் கூச்சல் குழப்பம் நிலவியது.

அமளிக்கு மத்தியில் பேசிய மத்திய அமைச்சர் கிரண் ரிஜிஜூ, ஒரு நீதிபதியை ஒரு அமைப்புடன் ஒப்பிட்டு பேசுவது எவ்வளவு பெரிய பிரச்சனை என தெரியாமல் திமுக எம்பிக்கள் பேசுவதாக கூறினார். மேலும் நீதிபதி தொடர்பான பேச்சால், திமுக எம்பி டி.ஆர்.பாலுவுக்கும் அவர் சார்ந்த கட்சிக்கும் தேவையற்ற பிரச்சனைகள் ஏற்படலாம் எனவும் கிரண் ரிஜிஜு எச்சரித்தார்.

பிறகு பேசிய மத்திய அமைச்சர் எல்.முருகன், உயர்நீதிமன்ற மதுரை அமர்வின் உத்தரவுப்படி திருப்பரங்குன்றம் மலைக்கு செல்பவர்கள் தடுக்கப்படுவதாக கூறினார்.

மேலும் திருப்பரங்குன்றம் மலைக்கு செல்பவர்களை எல்லாம் கைது செய்து மக்களின் வழிபாட்டு உரிமையை திமுக அரசு பறிப்பதாகவும் எல்.முருகன் குற்றஞ்சாட்டினார்.