அரசியல் கட்சிகளின் பொதுக்கூட்டங்கள், ரோடு ஷோக்களில் பங்கேற்கும் மக்களின் பாதுகாப்பிற்கு சம்மந்தப்பட்ட அரசியல் கட்சியினரே பொறுப்பு என, உயர்நீதிமன்றத்தில் தமிழக அரசு தாக்கல் செய்துள்ள வரைவு வழிகாட்டு நெறிமுறையில் கூறப்பட்டுள்ளது.

கரூர் கூட்ட நெரிசல் சம்பவத்தில் 41 பேர் உயிரிந்த நிலையில், இது தொடர்புடைய வழக்கில் அரசியல் கூட்டங்களை நெறிபடுத்த வழிகாட்டு விதிமுறைகளை வகுக்க நீதிமன்றம் உத்தரவிட்டது.

இது தொடர்பாக அனைத்து அரசியல் கட்சிகளுடனும் கருத்து கேட்பு கூட்டம் நடத்திய தமிழக அரசு, நிலையான வழிகாட்டு விதிகளின் வரைவு நகல்களை சென்னை உயர் நீதிமன்றத்தில் தாக்கல் செய்துள்ளது.

அதில், பொதுக்கூட்டங்கள், ஊர்வலங்கள், ரோடு ஷோக்கள், ஆர்ப்பாட்டம், போராட்டங்களுக்கு அனுமதி கோரும் கட்சியினர் கூட்டத்தில் எவ்வளவு மக்கள் பங்கேற்பார்கள், எத்தனை வாகனங்கள் வரும், பங்கேற்கும் முக்கிய தலைவர்களின் விவரங்களை குறிப்பிட்டு விண்ணப்பிக்க வேண்டும் எனவும், தலைவர்கள் ரோடு ஷோ, பொதுக்கூட்டம் தொடங்கும் இடம் மற்றும் முடிக்கும் இடத்தை குறிப்பிட வேண்டும் என குறிப்பிடப்பட்டுள்ளது.

பிரச்சாரக் கூட்டங்கள் என்றால் 10 நாட்களுக்கு முன்பும், 50 ஆயிரத்திற்கு மேல் திரளும் மாநாடு என்றால் 30 நாட்களுக்கு முன் அனுமதி கோர வேண்டும் என வரைவு வழிகாட்டு நெறிமுறையில் கூறப்பட்டுள்ளது. இவ்வழக்கின் விசாரணையை நவம்பர் 27-ம் தேதி ஒத்திவைத்த உயர் நீதிமன்றம், மனுதாரர்களான அதிமுக, த.வெ.க, உள்ளிட்ட கட்சிகளுக்கு வரைவு வழிகாட்டு விதிகள் நகல்களை வழங்கவும் தமிழக அரசுக்கு உத்தரவிட்டுள்ளது.