சேலம் மாவட்டம் வாழப்பாடி அருகே துக்க நிகழ்வுக்கு ஆறுதல் கூற சென்ற இடத்தில் டாக்டர் ராமதாஸ் ஆதரவு எம்.எல்.ஏவான அருளின் ஆதரவாளர்களுக்கும், பாமக தலைவர் அன்புமணி ஆதரவாளர்களுக்குமிடையே ஏற்பட்ட மோதலில் 6 கார்கள் அடித்து உடைக்கப்பட்டன.

டாக்டர் ராமதாஸின் ஆதரவாளராக தன்னை அடையாளப்படுத்திக் கொண்ட சேலம் எம்.எல்.ஏ அருள் பல்வேறு ஊர்களுக்கு சென்று கொடி ஏற்றுவது, புதிய உறுப்பினர் சேர்க்கையில் ஈடுபடுவது போன்ற நடவடிக்கைகளில் ஈடுபட்டு வந்தார்.

இந்த நிலையில் சேலம் மாவட்டம் வாழப்பாடி அடுத்த வடுகத்தம்பட்டி கிராமத்தில் டாக்டர் ராமதாஸ் ஆதரவாளரான தர்மராஜ் என்பவர் உயிரிழந்து விட்டதால் அவரது உடலுக்கு அஞ்சலி செலுத்துவதற்காக அருள் எம்.எல்.ஏ தனது ஆதரவாளர்களுடன் கார்களில் சென்றார். அங்கு இருந்த அன்புமணி ஆதரவாளரான ஜெயபிரகாஷ் என்பவர், தனக்கு சொந்தமான நிலத்தில் காரை நிறுத்தக்கூடாது என்று கூறியதாகவும், தங்கள் ஊருக்கு எதற்காக வந்தீர்கள் என்றும் கேட்டதாகவும் கூறப்படுகின்றது. எம்.எல்.ஏவுடன் வந்திருந்தவர்கள் அவரை சத்தம் போட்டு அனுப்பி வைத்ததாகவும் கூறப்படுகின்றது.

இந்த நிலையில் துக்க வீட்டில் இருந்து ஆதரவாளர்களுடன் திரும்பிய எம்.எல்.ஏ அருளை மறித்த ஜெயபிரகாசின் ஆதரவாளர்கள் கல்வீசி தாக்கியதாகவும், கட்டைகள் மற்றும் கம்பிகளால் கார் கண்ணாடிகளை அடித்து உடைத்ததாகவும் கூறப்படுகின்றது.

இதையடுத்து அருளின் ஆதரவாளர்களும் கீழே இறங்கி பதில் தாக்குதல் நடத்தினர். இருந்தாலும் உள்ளூர் காரர்கள் என்பதால் அவர்களின் தாக்குதல் வெறித்தனமாக இருந்ததாக கூறப்படுகின்றது.

இருதரப்பும் கல்வீசியும் தாக்கிக் கொண்டனர், இவ்வளவு களேபாரங்களுக்கும் இடையே அருள் எம்.எல்.ஏ காருக்குள் அமர்ந்து கொண்டார். அவரை காரில் இருந்து இறங்க வேண்டாம் என்று ஆதரவாளர்கள் கேட்டுக் கொண்டதாக கூறப்படுகின்றது.

இந்த தாக்குதல் சம்பவத்தில் 6 கார்கள் அடித்து உடைக்கப்பட்டதாகவும் , காயமடைந்தவர்கள் சிகிசைக்காக சேலம் அரசு மருத்துவமனைக்கு அழைத்துச்செல்லப்பட்டதாகவும் தெரிவித்த எம்.எல்.ஏ அருள், அன்புமணியின் தூண்டுதலின் பேரில் தன்னை கொல்ல முயற்சி நடந்ததாக குற்றஞ்சாட்டினார்.

இந்த சம்பவம் தொடர்பாக அன்புமணி மீது வழக்கு பதிவு செய்யக்கோரி அருள் எம்.எல்.ஏ அளித்துள்ள புகார் குறித்து போலீசார் விசாரித்து வருகின்றனர்.