ஆந்திர மாநிலம் ஸ்ரீகாகுளம் அருகே கோவில் கூட்ட நெரிசலில் சிக்கி 10 பெண்கள் உயிரிழந்த நிலையில், நெரிசலில் சிக்கி அவர்கள் உயிருக்குப் போராடிய பதைபதைக்க வைக்கும் காட்சிகள் வெளியாகியுள்ளன.

ஏகாதசியை முன்னிட்டு, அங்குள்ள வெங்கடேஸ்வரா சுவாமி கோவிலில் வழிபாடு செய்ய 25 ஆயிரத்துக்கும் மேற்பட்ட பக்தர்கள் குவிந்ததாகக் கூறப்படுகிறது.

மூவாயிரம் பக்தர்களை மட்டுமே சமாளிக்கும் அளவுக்கான கோவிலில் திடீரென 20 ஆயிரத்துக்கும் மேற்பட்டோர் குவிந்த நிலையில், அதற்கான இட வசதி இல்லாமல் கம்பித் தடுப்புகள் போடப்பட்ட வழியாகச் செல்லும்போது நெரிசல் ஏற்பட்டுள்ளது.

நெரிசலில் சிக்கிய பெண்கள் உடல் நசுங்கித் துடித்தபடி கூச்சலிட்டுள்ள்னர். மேலும் பலர் காற்றோட்டம் குறைந்து மூச்சுத் திணறி மயங்கிச் சரிந்தனர். கோவில் வளாகம் முழுவதும் கூச்சலும் அழுகையும் நிரம்பியது.

நெரிசலில் சிக்கி மயங்கியவர்களுக்கு CPR எனப்படும் செயற்கை சுவாசம் கொடுத்து காப்பாற்ற முயன்ற காட்சிகளும் வெளியாகியுள்ளன.

இந்தத் துயர சம்பவத்துக்கு இரங்கல் தெரிவித்துள்ள பிரதமர் மோடி, உயிரிழந்தவர்களின் குடும்பங்களுக்குத் தலா 2 லட்சம் ரூபாய் நிவாரணம் அறிவித்துள்ளார்.