சென்னை கோயம்பேட்டில் போதையில் போலீசாரை ஆபாசமாக பேசி அலம்பல் செய்ததாக சின்னத்திரை நிகழ்ச்சி தொகுப்பாளினியை போலீசார் கைது செய்தனர்.

போதையில் போலீசாரிடம் அலம்பல் செய்து விட்டு , போலீசார் தன்னை தாக்கி விட்டதாக வீடியோ வெளியிட்டு வசமாய் சிக்கிக் கொண்ட பழைய தொலைக்காட்சி நிகழ்ச்சி தொகுப்பாளினி ரேவதி இவர் தான்..!

சென்னை பாடி பகுதியை சேர்ந்தவர் ரேவதி (34) . இவர் பல்வேறு தனியார் தொலைக்காட்சிகளில் தொகுப்பாளினியாக இருந்தவர். சம்பவத்தன்று இரவு வித் அவுட் மேக் அப்பில் ரேவதியும், இவரது மாமா ராஜாவும் கோயம்பேடு சென்றுள்ளனர். பார்ட்டிக்கு சென்றுவிட்டு மதுபோதையில் தேர்தல் ஆணையம் அலுவலகம் முன்பாக உணவு வாங்க நின்று இருந்தாக கூறப்படுகிறது. அங்கு ரோந்து பணியில் இருந்த காவலர்கள் தனது மாமா வேஷ்டி அணிந்து இருந்ததை பார்த்து கேலி செய்யும் விதத்தில் பேசியதாகவும், அதனால் தான் போலீசாரிடம் வாக்குவாதத்தில் ஈடுபட்டதாகவும், ஒரு கட்டத்தில் வாக்குவாதம் முற்றிய நிலையில் போலீசார் தன்னை லத்தியால் கடுமையாக தாக்கியதாக குற்றம் சாட்டி வீடியோ ஒன்றை வெளியிட்டார் ஆங்கர் ரேவதி..!

வீடியோ வெளியான நிலையில் உயர் அதிகாரிகள் விசாரணை மேற்கொண்ட போது, சம்பவத்தன்று ரேவதி மதுபோதையில் காவல்துறையினரை ஆபாசமாக பேசி அலம்பல் செய்தது அம்பலமானது.

ஒரு கட்டத்தில் போலீசாரிடம் மட்டுமல்லாமல் தன்னை படம் பிடித்த ஆட்டோக்காரரிடமும் தகராறில் ஈடுபட்டு அடங்க மறுத்து அலப்பறை செய்ததாகவும், இதனால் காக்கி சட்டை போட்ட நபர், ரப்பர் பைப்பால் ரேவதியை விளாசியதும் தெரியவந்தது.

இதையடுத்து மதுபோதையில் காவல்துறையினரை ஆபாசமாக பேசிய விவகாரம் தொடர்பாக சி எம் பி டி போலீசார் வீடியோவை அடிப்படையாக வைத்து ரேவதி மீது சட்டபூர்வ நடவடிக்கை மேற்கொண்டனர். ஆபாசமாக பேசுதல் , அரசு ஊழியரை பணி செய்ய விடாமல் தடுத்தல், மிரட்டல் விடுத்தல் ஆகிய மூன்று சட்ட பிரிவுகளின் கீழ் சி எம் பி டி போலீசார் வழக்குப்பதிவு செய்து ரேவதியை கைது செய்தனர். அதே நேரத்தில் ரேவதியை ரப்பர் பைப்பால் தாக்கிய காக்கிச்சட்டை அணிந்த நபரையும் போலீசார் தேடி வருகின்றனர்.