சேலம் புதிய பேருந்து நிலையம் அருகே உள்ள மேம்பாலத்தில், செல்போனை பறித்து வழிப்பறி செய்ததாக வீடியோ வெளியான நிலையில், அந்த சம்பவம் தொடர்பாக மாநகர காவல் ஆணையர் ஏ.கே.கிரி விளக்கமளித்துள்ளார்.

திருநெல்வேலியைச் சேர்ந்த பிரம்மநாயகம் என்ற அந்த நபர், சிறுமி ஒருவருக்கு இன்ஸ்டா மூலம் தொல்லை கொடுத்து வந்ததால், ஆத்திரமடைந்த சிறுமியின் நண்பர், தனது கூட்டாளிகளுடன் சேர்ந்து அந்த ஆசாமியின் செல்போனைப் பறித்து உடைத்து போட்டுள்ளதாக, காவல் ஆணையர் தெரிவித்தார்.

சேலம் அம்மாபேட்டை அருகே 18 வயது இளைஞர், சிறுமி ஒருவருடன் நட்பில் இருந்துள்ளார். சுமார் 5 மாதங்களுக்கு முன்பு, திருநெல்வேலியைச் சேர்ந்த பிரம்மநாயகம் என்ற நபர், சுரேஷ் என்ற பெயரில், போலி இன்ஸ்டா ஐடி மூலம் சிறுமிக்கு தொல்லை கொடுத்ததாக கூறப்படுகிறது.

இதுபற்றி சிறுமி தனது ஆண் நண்பரிடம் கூறியுள்ளார். இதையடுத்து பிரம்மநாயகத்தை தொடர்பு கொண்டு சிறுமியின் நண்பர் எச்சரித்த நிலையில், பெண் பெயரில் இன்ஸ்டா ஐடி ஒன்றை உருவாக்கி, மீண்டும் அந்த ஆசாமி அட்டகாசத்தில் ஈடுபட்டதாக கூறப்படுகிறது. இதனைத் தொடர்ந்து, சிறுமியின் நண்பர், பெண் பெயரில், ஃபேக் இன்ஸ்டா ஐடியை உருவாக்கி, சேலத்திற்கு வரவைத்து, செல்போனை பறித்து, உடைத்துப் போட்டதாக கூறப்படுகிறது.