வங்கக்கடலில் வரும் 27 ஆம் தேதி காலை உருவாகும் மோன்தா புயல் 28 ஆம் தேதி வாக்கில் தீவர புயலாக வலுவடைந்து ஆந்திராவை நோக்கி நகரும் என வானிலை ஆய்வு மையம் தெரிவித்துள்ளது.

இந்திய வானிலை ஆய்வு மையம் வெளியிட்டுள்ள முன்னறிவிப்பில் , இன்று காலை 5.30 மணி நிலவரப்படி தென்கிழக்கு வங்கக்கடலில் நிலவி வந்த ஆழ்ந்த காற்றழுத்த தாழ்வு பகுதி மேற்கு திசையில் நகர்ந்து காற்றழுத்த தாழ்வு மண்டலமாக வலுவடைந்து சென்னைக்கு 990 கிலோ மீட்டர் தொலைவில் நிலவுவதாக தெரிவித்துள்ளது. மேலும், மேற்கு - வடமேற்கு திசையில் நகர்ந்து நாளை ஆழ்ந்த காற்றழுத்த தாழ்வு மண்டலமாக வலுவடையும் என தெரிவிக்கப்பட்டுள்ளது.

இந்த நிலையில், புயல் உருவாகும் சூழலை குறிக்கும் வகையில் சென்னை, புதுச்சேரி, தூத்துக்குடி உள்ளிட்ட 9 துறைமுகங்களில் புயல் ஒன்றாம் எண் புயல் எச்சரிக்கை கூண்டு ஏற்றப்பட்டுள்ளது.

மோன்தா புயல் உருவான பின் வடமேற்கு திசையில் ஆந்திராவை நோக்கி நகரும் எனவும் இதனால் தமிழ்நாட்டில் வட மாவட்டங்களில் பரவலாகவும், தென்மாவட்டங்களில் ஒருசில இடங்களிலும் மழைக்கு வாய்ப்புள்ளதாக வானிலை ஆய்வு மையம் தெரிவித்துள்ளது. வங்கக்கடலில் மீன்பிடித்து வரும் மீனவர்கள் உடனடியாக கரைக்கு திரும்ப வேண்டும் எனவும் எச்சரித்துள்ளது.