தீபாவளியையொட்டி வெளியான படங்களில் பிரதீப் ரங்கனாதனின் நடிப்பில் வெளியான டியூட் திரைப்படம் முதல் நாளில் உலகம் முழுவதும் 22 கோடி ரூபாயை வசூலித்து ரசிகர்களை கொண்டாட வைத்துள்ளது.

80 களின் கே.பாக்யராஜ்.. 90 களின் எஸ்.ஜே.சூர்யா.. 2 கே களின் தனுஷ் ஆகியோரின் கலவையாக காட்சிக்கேற்ற நடிப்பை முகபாவனைகளில் வெளிப்படுத்தி , இளைய தலைமுறை திரை ரசிகர்களை கொண்டாட வைத்துள்ளார் gen Z நடிகர் பிரதீப் ரங்கனாதன்..!

இந்த தீபாவளிக்கு வெளியான டியூட், பைசன், டீசல், கம்பி கட்டுற கதை ஆகிய படங்களில் பிரதீப் ரங்கனாதனின், டியூட் வெளியான முதல் நாளிலேயே முன்னனி நாயகர்களின் படங்களுக்கு இணையான வசூலை உலகம் முழுவதும் பெற்றுள்ளதாக தகவல் வெளியாகி உள்ளது.

டியூட் திரைப்படம் கலகலப்பாக செல்வதால் முதல் நாளில் 22 கோடி ரூபாயை அள்ளி இருப்பதாக தயாரிப்பு நிறுவனமான மைத்ரி மூவி மேக்கர்ஸ் அறிவித்துள்ளது. சென்னையில் உள்ள திரையரங்குகளில் 16 வது நாளிலும் ஆதிக்கம் செலுத்தும் காந்தாராவுக்கு இணையாக , டியூட் படத்தின் டிக்கெட் முன் பதிவுகள் அதிகரித்து இருப்பதாக திரையரங்கு உரிமையாளர்கள் தெரிவித்தனர்.

பிரதீப் ரங்கநாதனுக்கு , தெலுங்கிலும் கணிசமாக ரசிகர்கள் இருப்பதால் அங்கும் அவரது படத்தின் வசூல் உயர்ந்துள்ளதாக கூறப்படுகின்றது. அதே நேரத்தில் பெரும் எதிர்பார்ப்புக்கு இடையே வெளியான துரூவ் விக்ரமின் பைசன் திரைப்படம் பாராட்டுக்களை பெற்றாலும் , சாதிய சர்ச்சையில் சிக்கி உள்ளது.

தூத்துக்குடி மாவட்டத்தில் உள்ள இரு சாதி மக்களிடையே 30 வருடங்களாக இருந்து வரும் ஒரு வகை பதற்றத்தை தணித்து அமைதியை உருவாக்கும் விதமாக நடுநிலையுடன் படம் உருவாக்கப்பட்டுள்ளதாக சினிமா விமர்சகர்கள் பைசன் படத்தை பாராட்டினர்

ஆனால் அந்த இரு சாதி தரப்பில் இருந்தும் இயக்குனர் மாரி செல்வராஜுக்கு எதிராக ஒரு சிலர் விமர்சனங்களை முன்வைத்துள்ளனர். படத்தில் லால் நடித்துள்ள கந்தசாமி கதாபாத்திரம் என்கவுன்டரில் கொல்லப்பட்ட வெங்கடேச பண்ணையாரையும், அமீர் நடித்துள்ள பாண்டியராஜா கதாபாத்திரம் , வீட்டுக்குள் பூட்டி வெட்டிக் கொல்லப்பட்ட பசுபதிபாண்டியனையும் வைத்து காட்சி படுத்தப்பட்டிருப்பதாக கூறப்படுகின்றது.

நடிகர் அமீர் , இது உண்மை சம்பவம் என்று கூறினாலும், பைசன் படக்குழுவினரோ இது கபடி வீரர் மணத்தி கணேசனை மனதில் வைத்து உருவாக்கப்பட்ட கற்பனை கதை என்றும் யாரையும் குறிப்பிடவில்லை என்றும் மறுத்துள்ளனர்.

ஹரிஷ் கல்யாணின் டீசல் படமும் புதிய கதைக்களத்துடன், விறுவிறுப்பான திரைக்கதையுடன் நகர்வதாக சொல்லப்படுவதால், அதனை பார்க்கவும் திரையரங்கில் ரசிகர்கள் விருப்பம் தெரிவித்துள்ளனர். மொத்தத்தில் இப்பதான் தீபாவளி சினிமா ரேஸ் சூடு பிடிக்க தொடங்கி உள்ளது.