சென்னை உயர்நீதிமன்றம் அருகே தனது கார் ஸ்கூட்டர் மீது மோதியதை நிரூபித்தால் மன்னிப்புக் கேட்க தயார் என்று விசிக தலைவர் திருமாவளவன் கூறியுள்ளார். ஆனால் ஸ்கூட்டர் மீது கார் மோதுவது போன்ற வீடியோவே இருக்கும் நிலையில் திருமாவளவனுக்கு வேறு என்ன ஆதாரம் வேண்டும் என வீடியோவைப் பார்த்த மக்களும் சமூக வலைதளவாசிகளும் கேள்வி எழுப்பி வருகின்றனர்.

சென்னை உயர் நீதிமன்றம் அருகே விசிக தலைவர் திருமாவளவனின் கார் இடித்ததாக கூறி வழக்கறிஞர் ராஜீவ் காந்தி தனது ஸ்கூட்டரை சாலையில் நிறுத்தி திரும்பி பார்த்த போது, அங்கு வந்த விசிகவினர் தாக்குதல் நடத்திய வீடியோ வெளியானது.

சம்பவத்தன்று திருமாவளவனின் கார் மீது ஸ்கூட்டரில் வந்த ராஜீவ் காந்தி மோதி தகராறு செய்ததாக விசிக வழக்கறிஞர் பார்வேந்தன் என்பவர் எஸ்பிளனேடு காவல் நிலையத்தில் எழுத்துப்பூர்வமாக புகார் அளித்திருந்தார்.

ஆனால் காவல் நிலையத்தில் விசிகவினர் புகார் அளித்த அதே நாள் திருமாவளவன் வெளியிட்ட காணொலியில் தனது காரும், ஸ்கூட்டரும் மோதவே இல்லை தெரிவித்திருந்தார்.

ஆனால் சம்பவத்தின் போது ஸ்கூட்டரில் இருந்தபடி திரும்பிய வழக்கறிஞர் ராஜீவ் காந்தி ஓட்டுனரை பார்த்து மட்டுமே கையை நீட்டி பேசும் வீடியோ வெளியாகி உள்ளது.

திருமாவளவனின் கார் மோதியதாக கூறி வழக்கறிஞர் ராஜீவ் காந்தி தனது ஸ்கூட்டரை நிறுத்தியது அவரை விசிகவினர் அடித்து விரட்டி விட்டது, திருமாவின் கார் அங்கிருந்து புறப்பட்டது என அனைத்தும் ஒரு நிமிடத்திற்குள்ளாக நடந்து முடிந்துவிட்டது என்பது தான் உண்மை..!

ஆனால் காவல்துறையில் விசிக வழக்கறிஞர் ரஜினிகாந்த் தரப்பில் அளிக்கப்பட்டுள்ள புகாரில் திருமாவளவனின் கார் , ஸ்கூட்டரில் இடித்த சம்பவம் நிகழ்ந்தது மதியம் 2;34 மணிக்கு என்றும் ஆனால் அடுத்த 4 நிமிட இடைவெளியில் 2;39 மணிக்கே பாலிமர் தொலைக்காட்சியில் அது தொடர்பான செய்தி பதிவேற்றம் செய்யப்பட்டதாக குறிப்பிட்டுள்ளது பொய்களின் உச்சம்..!.

ஏனென்றால் உண்மையில் திருமாவளவன் கார் - ஸ்கூட்டர் பிரச்சனை சம்பவத்தை நேரில் பார்த்த வழக்கறிஞர்களில் ஒருவர் காட்சிகளை செல்போனில் எடுத்து சமூக வலைதளங்களில் பதிவிட்டிருந்தார். இந்த வீடியோ பாலிமர் செய்தியாளரின் செல்போனுக்கு கிடைத்தது மாலை 3: 14 மணி..! செய்தியாளர் சம்பவத்தின் உண்மை தன்மையை உறுதி செய்த பின்னர் அலுவலகத்திற்கு அனுப்பியது மாலை 3;29 மணி ..! அதனை அண்மை செய்தியாக பாலிமர் தொலைக்காட்சி ஒளிபரப்பியது 3: 43 மணி. உண்மை இப்படி இருக்க, சம்பவம் நடைபெற்ற நான்கே நிமிடங்களில் செய்தி வெளியிட்டதால் அரசியல் சதி இருப்பதாக விசிக வழக்கறிஞர் ரஜினிகாந்த் அளித்துள்ள புகார் விநோதத்தின் உச்சம்.

இந்த நிலையில் திருப்போரூரில் பேசிய திருமாவளவன், ஸ்கூட்டரில் வந்த ராஜீவ் காந்தி முறைத்து பார்த்த காரணத்தினால் தங்கள் கட்சியினர் லேசாக சில தட்டுகள் தட்டியதாக கூறி அதிர்ச்சி அளித்துள்ளார்.

அடுத்ததாக திருச்சி விமான நிலையத்தில் பேட்டியளித்த திருமாவளவன் சென்னையில் தன்னுடைய கார் டூவீலர் மீது மோதியதாக தவறான கருத்து பரப்பப்பட்டு வருவதாகவும், கார் மோதியதை நிருபித்தால் தான் மன்னிப்பு கேட்க தயாராக இருப்பதாகவும் தெரிவித்தார்.

இதனிடையே சம்பவம் நடைபெற்றபோது விசிக பிரமுகர் ஒருவரது கார் டேஷ்போர்டு கேமராவில் பதிவான வீடியோவிலேயே ஸ்கூட்டர் மீது கார் மோதியது நன்றாகத் தெரிவதாக வீடியோவைப் பார்த்தவர்கள், சமூக வலைதளப் பயனாளர்கள் உள்ளிட்ட பல்வேறு தரப்பினரும் கூறி வருகின்றனர். எனவே வீடியோ ஆதாரமே இருக்கும்போது ஸ்கூட்டர் மீது கார் மோதியதற்கு வேறு ஆதாரம் என்ன தேவை என்ற கேள்வி எழுகிறது.

மேலும் அடங்க மறு என்பதற்கு வன்முறையை தூண்டுவதாக அர்த்தம் அல்ல என்றும் புது விளக்கம் ஒன்றை அளித்தார் திருமாவளவன்