"என்னை விவாகரத்து செய்யாதீர்கள்.. தயவு செய்து கணவரோடு என்னை பேச விடுங்கள்" என திருமணமான ஒரு வருடமே ஆன இளம்பெண் ஒருவர், கணவர் வீட்டின் முன்பு கெஞ்சி மன்றாடிய காட்சிகள் தான் இவை..

திருவாரூர் மாவட்டம் புகையிலை தோட்டம் கனிமுத்து நகர் பகுதியை சேர்ந்தவர்கள் சந்திரன் - அம்சவள்ளி தம்பதியினர். இவர்களது மூத்த மகனான 25 வயது மணிகண்டன், திருவாரூரில் உள்ள தனியார் நிதி நிறுவனத்தில் வேலை பார்த்து வருகிறார்.

மணிகண்டனுக்கும், நாகை மாவட்டம் ஆழியூர் பகுதியைச் சேர்ந்த 21 வயது இளம்பெண் ஒருவருக்கும் பெரியோர்களால் நிச்சயம் செய்யப்பட்டு, கடந்த 2024 ஆம் ஆண்டு பிப்ரவரி மாதம் திருமணம் நடைபெற்றது.

திருமணத்திற்காக பெண் வீட்டார் தரப்பில் இருந்து, 21 சவரன் நகை வரதட்சணையாக போடுவதாக கூறி, 16 சவரன் நகைகளையும், 6 லட்சம் ருபாய்க்கு சீர் வரிசைகளும் வழங்கியதாக கூறப்படுகிறது.

திருமணம் ஆன ஒரு மாதத்தில் இருந்தே மணிகண்டன் குடும்பத்தினர், 20 சவரன் நகையும், பிஸ்னஸ் செய்வதற்காக 5 லட்சம் ரூபாய் ரொக்கமாகவும் கேட்டு, வீட்டிற்கு வந்த மருமகளை டார்ச்சர் செய்ததாக சொல்லப்படுகிறது.

அதுமட்டுமில்லாமல், மணிகண்டனின் தந்தை சந்திரன், மருமகளுக்கு வளையல் போட்டு விடுவதாக கூறி, தொடர்ந்து பாலியல் ரீதியாக டார்ச்சர் கொடுத்து வந்ததாகவும் பெண் வீட்டார் தரப்பில் கூறப்படுகிறது.

திருமணமான ஆறு மாதத்தில் வரதட்சணை சம்பந்தமாக ஏற்பட்ட பிரச்சனையில் மாமனார் சந்திரன் மருமகளை வயிற்றில் எட்டி உதைத்ததில் கரு கலைப்பு ஏற்பட்டதாகவும் சொல்லப்படுகிறது.

இதையெல்லாம் தனது கணவர் மணிகண்டனிடம் அந்த பெண் தெரிவிக்க, நான் பார்த்துக் கொள்கிறேன் என கூறிவிட்டு எந்த நடவடிக்கையும் எடுக்கவில்லை என சொல்லப்படுகிறது.

பின்னர் திருவாரூர் மகளிர் காவல் நிலையம் மற்றும் திருவாரூர் மாவட்ட சமூகநலத்துறை அதிகாரிகளிடம் பெண் வீட்டார் புகார் அளித்தும் உரிய நடவடிக்கை எடுக்கவில்லை என தெரிவித்துள்ளனர்.

மேலும் மணிகண்டனின் தாயார் அம்சவள்ளி, தனது மகனையும், மருமகளையும் தனி குடித்தனம் வைத்துள்ளார். அப்போது காலையில் 6 மணிக்கு வேலை செல்லும் தனது கணவர் இரவு 12 மணிக்கு தான் வீடு திரும்புவார் எனவும், தானும் வெளியே எங்கும் செல்ல முடியாதபடி, வீட்டில் வைத்து பூட்டி விட்டு சென்று விடுவார் என அந்த பெண் தெரிவித்துள்ளார்.

இது குறித்து கேட்டால் தனது கணவர் தன்னை அடித்து உதைத்து டார்ச்சர் செய்வார் எனவும் பாதிக்கப்பட்ட பெண் குறிப்பிட்டுள்ளார். இதன் காரணமாகவே 6 மாதம் கணவரை பிரிந்து அந்த பெண் தாயார் வீட்டில் வசித்து வந்துள்ளார்.

இந்த நிலையில் மணிகண்டன் தனது மனைவியை விவாகரத்து செய்வதற்கான நோட்டீஸ் அனுப்பி உள்ளார்.

வழக்கு நீதிமன்றத்தில் நிலுவையில் இருக்கும் நிலையில் காலையிலேயே கணவரின் வீட்டிற்கு சென்ற அந்த பெண், நகைக்காக என்னை விவகாரத்து செய்யாதீர்கள், எனது கணவரோடு என்னை பேச விடுங்கள், அவருடன் நான் சேர்ந்து வாழ வேண்டும், நீங்களும் ஒரு பெண் தானே அத்தை, என் கணவருடன் என்னை சேர்த்து வையுங்கள், அவரைப் பற்றி எனக்கு தெரியும், அவர் என்னுடன் சேர்ந்து வாழவே விருப்பப்படுகிறார் என்று வாசல் முன்பே கதறி அழுதுள்ளார்.

இரவு வரை அந்த பெண் போராட்டத்தில் ஈடுபட்ட போதும், கணவரின் குடும்பத்தினர் வெளியே கூட வரவில்லை.

நடந்த சம்பவம் குறித்து மணிகண்டன் தரப்பை கேட்க, நமது செய்தியாளர்கள் போனில் தொடர்பு கொள்ள முயற்சித்த போது அவர்கள் தொலைபேசி அழைப்பை ஏற்கவில்லை.

திருமணம் ஆன ஒரு வருடமே ஆன நிலையில், இளம்பெண் தன்னை தனது கணவரோடு சேர்த்து வைக்க போராட்டம் நடத்தியதால் அப்பகுதியே பரபரப்பானது.