நம்பி டெபாசிட் செய்த 2 லட்சம் ரூபாய் பணத்தை தனது வங்கி கணக்கில் இருந்து இந்தியன் வங்கி ஊழியர்கள் மோசடியாக எடுத்துக் கொண்டதாக முதியவர் ஒருவர் பரபரப்பு குற்றச்சாட்டை முன்வைத்துள்ளார்.

“இறைவா வயதான காலத்தில் தனக்கு இது போன்ற சோதனையெல்லாம் தேவையா” என முதியவர் ஆதங்கம் கொள்ள என்ன காரணம் ?

ஏற்கனவே திருவள்ளூர் இந்தியன் வங்கியில் நடந்த மோசடிக்கே விடைதெரியாத நிலையில் மீண்டும் ஒரு மோசடியா? என்ன நடந்தது இந்தியன் வங்கிக்குள் ... விவரிக்கின்றது இந்த செய்தித் தொகுப்பு..

சென்னை மண்ணடி புது தெருவில் வசித்து வரும் 70 வயதான சீனியர் சிட்டிசன் குமார் என்பவர் தான் இந்தியன் வங்கு ஊழியர்கள் மீது அடுக்கடுக்காண புகார்களை முன் வைத்தவர்.

70 வயதிலும் எல்.ஐ.சி.யில் எஜெண்டாக பணி புரிந்து வரும் குமார்., மண்ணடி இந்தியன் வங்கி கிளையில்., கடந்த 40 ஆண்டுகளாக இந்தியன் வங்கி கிளையில் சேமிப்பு கணக்கு பராமரித்து வரும் நிலையில , கடந்த நான்கு ஆண்டுகளாக முன்பு இரண்டு லட்சம் ரூபாயை வைப்பு தொகையாக செலுத்தி உள்ளார்.

அதற்கு ஆதாரமாக., மாதம் தோறும் குறிப்பிட்ட தொகை வட்டியாக பெற்று வந்துள்ளார் குமார். மாதந்தோறும் 10 ஆயிரம் ரூபாய் முதல் 15 ஆயிரம் ரூபாய் வரை பண பரிவர்த்தனை செய்து வந்ததாகவும் கூறப்படுகின்றது.

இந்த நிலையில்., கடந்த இரண்டு மாதத்திற்கு முன்பு வைப்பு தொகையை திரும்ப பெற, சம்மந்தப்பட்ட வங்கி கிளையை தொடர்பு கொண்ட போது., உங்களுடைய வங்கி கணக்கில்., ஒரு லட்சத்து 80 ஆயிரம் ரூபாய் கடன் பாக்கி இருப்பதாகவும் அதனை திருப்பி செலுத்த வேண்டும் என்றும் வங்கி ஊழியர்கள் தெரிவித்தை கண்டு அதிர்ச்சி அடைந்த முதியவர் தான் எந்தவிதமான லோனும் பெறவில்லை என வங்கி ஊழியர்களிடம் தெரிவித்துள்ளார்.

கடந்த ஆகஸ்ட் மாதம் 28ம் தேதி சொந்த வேலை காரணமாக ஊருக்கு சென்றிருந்த போது., வங்கி கணக்கின் ரகசிய குறியீட்டை சொல்லுங்கள் என., வங்கி ஊழியர்கள் கேட்டதாகவும் தானும் வங்கி ஊழியர்கள் தானே என்று நம்பி தெரிவித்த நிலையில் தனது வங்கி கணக்கில் இருந்து 50,000 ரூபாய் முதல் 1 லட்சம் ரூபாய் வரை தொடர்ந்து மோசடியாக எடுத்துள்ளதாக குற்றஞ்சாட்டுகிறார் குமார்

தன்னுடைய வங்கி கணக்கை ஆய்வு செய்த போது, வங்கி ஊழியர்கள் ஒரு லட்சம் ரூபாய் டெபாசிட் செய்வதும், அதில் 50 ஆயிரம் ரூபாய் எடுப்பதும், மீண்டும் ஒரு லட்சம் ரூபாய் டெபாசிட் செய்வதும் அதிலிருந்து 50,000 எடுப்பதுமாக இருந்துள்ளனர் என்றும் இது போன்று ஏழு எட்டு முறை எடுத்திருப்பது தெரியவந்துள்ளதாக முதியவர் குமார் தெரிவித்தார்.

இந்த மோசடி குறித்து வங்கி ஊழியர்களிடம் கேட்ட போது, இதற்கும் பிக்சட் டெபாசிட்டிற்கும் எந்த தொடர்பும் இல்லை என வங்கி ஊழியர்கள் தெரிவித்ததாகவும் தன்னுடைய பிக்சட் டெபாசிட் பணம் 2 லட்சம் ரூபாய் என்னவானது ? என்பதற்கு முறையான பதில் இல்லை என்றும் வேதனை தெரிவித்தார்.

இந்தியன் வங்கி கிளை உயர் அதிகாரிகளுக்கு தெரியாமல் எந்தவித பண பரிவர்த்தனையும் நடக்காது என்பதால் , இது குறித்து முத்தியால்பேட்டை காவல் நிலையத்தில் புகார் அளித்திருப்பதாக குமார் தெரிவித்தார். “இறைவா இது போன்ற சோதனை இந்த தள்ளாத வயதில் இந்த சோதனை தேவையா?” என ஆதங்கத்தை வெளிப்படுத்தினார்.

இந்த புகார் குறித்து மண்ணடி கிளை இந்தியன் வங்கி மேலாளாரிடம் விளக்கம் கேட்ட போது, இது குறித்து தான் எந்த தகவலும் தெரிவிக்க இயலாது என்று இந்தியன் வங்கி தலைமை அலுவலகம் மட்டுமே என்ன நடந்தது ? என்று விளக்கம் தெரிவிக்கும் என்றும் முடித்துக் கொண்டார்.

ஏற்கனவே திருவள்ளூர் இந்தியன் வங்கியில் டெபாசிட் செய்தவர்கள் பணத்தை மொத்தமாக பறிகொடுத்து தவிப்பது போல, முதியவர் குமாரின் பணமும் மோசடியாக திருடப்பட்டதா ? அல்லது விசாரணை செய்து உரியவர்களிடம் இருந்து திருப்பி தரப்படுமா ? என்பது இந்தியன் வங்கி எடுக்கும் முடிவை பொறுத்து உள்ளது.

அதே நேரத்தில் வங்கியில் கடன் பெற்று திருப்பி செலுத்தாதவர்களை சட்டப்பிரிவுகளை நீட்டி கைகளை கட்டி சொத்துக்களை பறிமுதல் செய்யும் வங்கிகள், தங்களிடம் டெபாசிட் செய்த தொகையை வாரி சுருட்டும் வங்கி ஊழியர்கள் மீது முறையான விசாரணை நடத்தி கடுமையான நடவடிக்கை மேற்கொள்ள வேண்டும் என்பதே அனைவரின் ஆதங்கமாக உள்ளது.

விதியை மீறி செய்தாலும், விதியை பயன்படுத்தி செய்தாலும் குற்றம் கேடு தரும்..!