2023 ஆம் ஆண்டு வெளியான விஜய்யின் லியோ திரைப்படம் 600 கோடிகளுக்கும் அதிகமாக வசூலித்ததாக விளம்பரப்படுத்தப்பட்ட நிலையில், அந்த படம் திரையரங்குகளில் 160 கோடி ரூபாய் மட்டுமே வருமானம் ஈட்டியதாக படத்தின் தயாரிப்பாளர் கணக்கு தாக்கல் செய்துள்ளார்.

லோகேஷ் கனகராஜ் இயக்கத்தில் , விஜய் நடிப்பில் 2023 ஆம் ஆண்டு வெளியான லியோ திரைப்படம் முதல் நாளிலேயே 148.5 கோடி ரூபாய் வசூலித்து சாதனை படைத்ததாக விளம்பரம் வெளியிட்டு இந்திய திரையுலகை மிரள வைத்தார் தயாரிப்பாளர் லலித்குமார்..!

காரணம் லியோவை விட 4 ஆயிரம் திரையரங்குகளுக்கும் அதிகமாக திரையிடப்பட்ட ஷாருக்கானின் பதான் படம் கூட முதல் நாள் 104 கோடி மட்டுமே வசூலித்ததாக தயாரிப்பு நிறுவனம் அறிவித்தது. அதெப்படி திமிங்கிலம் வெளியிட்ட திரையரங்குகளின் எண்ணிக்கைக்கும் வசூலுக்கும் முரண்பாடாக உள்ளதே என்று எல்லோரும் கேள்வி எழுப்பினர்.

ஆனாலும் முதலில் சொன்ன வசூல் கணக்கை அடுத்தடுத்து நாட்களிலும் அதிகப்படுத்திய லியோ தயாரிப்பாளர் லலித்குமார், 4 நாட்களில் 405.5 கோடி என்றும் என்றும் 7 நாட்களில் 461 கோடி என்றும் 12 நாட்களில் 540 கோடி என்றும் ஒட்டு மொத்தமாக 600 கோடி என்றும் வித விதமாக போஸ்டர் வெளியிட்டு பரபரப்பை ஏற்படுத்தினார்.

இதனை தங்கள் நாயகனின் சாதனையாக இன்று வரை விஜய் ரசிகர்கள் மற்ற நாயகர்களின் படங்கள் இந்த அளவுக்கு வசூலிக்கவில்லை என்று கேலி செய்து வந்தனர். இந்த நிலையில் லியோ படம் தியேட்டரில் மொத்தமே 160.50 கோடி மட்டுமே வசூலித்ததாக வருமான வரித்துறையிடம் கணக்கு தாக்கல் செய்துள்ளார் லியோ படத்தின் தயாரிப்பாளர் லலித்குமார்.

அப்படி என்றால் 400 கோடி கணக்கு எல்லாம் எப்படி வந்தது ? என்று கேட்கும் அப்பாவி ரசிகர்களுக்கு , லியோ டிஜிட்டல் உரிமத்தை 124 கோடி ரூபாய்க்கும், ஆடியோ உரிமையை 24 கோடியும், இந்தி உரிமத்தை 24 கோடிக்கும், தென்னிந்திய சாட்டிலைட் உரிமையை 72 கோடி ரூபாய்க்கும் விற்றதால் ஒட்டு மொத்தமாக 404.56 கோடி ரூபாய் வந்திருப்பதாகவும் லலித்குமார் வருமானவரி கணக்கு தாக்கல் செய்துள்ளார்.

இதனை மறைத்து தான் லியோ 600 கோடி ரூபாய் வசூல் என்று விளம்பரப்படுத்தி லலித் லியோவுக்கு வெற்றிவிழா நடத்தி இருப்பதாக மற்ற நடிகர்களின் ரசிகர்கள் விமர்சித்து வருகின்றனர். இதனை நினைவூட்டும் விதமாகவே, ரஜினியின் கூலி திரைப்படம் 4 நாட்களில் ரூ 404 கோடி பிளஸ் என்று பதிலடியாக விளம்பரப்படுத்தப்பட்டதாக கூறப்படுகின்றது. இந்த விவரம் அறிந்த ரஜினி ரசிகர்கள் “கூலி 404 கோடி பிளஸ் ஓவர் டேக், ஒட்டு மொத்தமாவே” என்று சமூக வலைதளங்களில் பதிவிட்டு வருகின்றனர்.

இனி கூலிப்படம் உண்மையிலேயே எவ்வளவு வசூல் ? என்பது அந்த படத்தின் தயாரிப்பாளர் வருமான வரி கணக்கு தாக்கல் செய்யும் போது வெளிச்சத்துக்கு வரும் என்று எதிர்பார்க்கப்படுகின்றது.