திருகோவிலூர் அடுத்த மணலூர் பேட்டையில் த.வெ.க தலைவர் விஜய் படத்தை முதலாவதாக அச்சிட்டு, அடுத்த முதல் அமைச்சர் யார் ? என்று சர்வே எடுக்க துண்டுச்சீட்டு கொடுத்த நபரை சுற்றிவளைத்த பா.ம.கவினர் சரமாரி கேள்வி எழுப்பியதோடு, சர்வே எடுக்கவிடாமல் விரட்டிய சம்பவத்தால் பரபரப்பு ஏற்பட்டது.

கள்ளக்குறிச்சி மாவட்டம் திருக்கோவிலூர் அருகே உள்ள ரிஷிவந்தியம் சட்டமன்ற தொகுதிக்குட்பட்ட மணலூர்பேட்டை பேரூராட்சியில் வெள்ளிக்கிழமை காலை ஐந்துக்கும் மேற்பட்ட நபர்கள் கையில் துண்டு சீட்டு ஒன்றை வைத்து அடுத்த முதல் அமைசாராக யார் வர விரும்புகிறீர்கள் என்று கேட்டு சர்வே எடுத்தனர். அந்த சீட்டில் முதலில் த.வெ.க தலைவர் விஜய் படமும், இரண்டாவதாக திமுக தலைவரும் தமிழ்நாடு முதலமைச்சருமான ஸ்டாலின் படமும், மூன்றாவதாக எதிர்க்கட்சித் தலைவர் எடப்பாடி பழனிச்சாமி படமும், நான்காவதாக நாம் தமிழர் கட்சி ஒருங்கிணைப்பாளர் சீமான் ஆகிய நான்கு பேரின் புகைப்படங்கள் மட்டும் அச்சிடப்பட்டிருந்தது.

இந்த துண்டு சீட்டுகளை வழங்கி அதில் உங்களுடைய முதல்வர் வேட்பாளர் யார் ? என டிக் செய்து கொடுக்குமாறு சர்வே எடுத்து வந்ததாக சொல்லப்படுகின்றது. இது குறித்த தகவல் அறிந்து அங்கு வந்த பாமக அன்புமணி அணியச் சேர்ந்த மாநிலத் துணைத் தலைவர் மணிகண்டன், சர்வே எடுத்த நபரை பிடித்து சரமாரியாக கேள்வி எழுப்பினார்.

இதுவரை தேர்தலையே சந்திக்காத விஜயின் படத்தை முதலாவதாக போட்டதற்கு என்ன காரணம்? தற்போதைய தமிழ்நாடு முதலமைச்சர் ஸ்டாலின் புகைப்படத்தை முதலில் பதிவு செய்துவிட்டு அதன் பிறகு ஒவ்வொரு கட்சித் தலைவர்களின் பெயரையும் பதிவு செய்திருக்க வேண்டும், விஜய்க்கு ஆதரவாகவே இந்த சர்வேவை நீங்கள் எடுத்து வருகிறீர்கள். யார் உங்களுக்கு இந்த அதிகாரம் கொடுத்தது என்றார்

இந்த தொகுதிக்கு அதிகம் செய்த விஜயகாந்தின் புகைப்படம் எங்கே உள்ளது? மத்திய அமைச்சராக இருந்த அன்புமணியின் புகைப்படம் எங்கே உள்ளது? ஏன் மக்கள் மனதில் இவர்தான் முதலமைச்சர் என்று திணிக்கிறீர்கள்? சர்வே எடுப்பதை பொதுவாக எடுக்க வேண்டும் என்றார்

அனைத்து கட்சி தலைவர்களின் புகைப்படத்தையும் அதில் பதிவிட்டு இருக்க வேண்டும், திருமாவளவனின் புகைப்படம் எங்கே? என்றும் அடுத்தடுத்து சரமாரியாக கேள்வி எழுப்பினார்.

இதில் அச்சமடைந்த அந்த நபர்கள் அதன்பிறகு நாங்கள் சர்வே எடுக்கவில்லை எனக் கூறி அங்கிருந்து இடத்தை காலி செய்தனர்.