கே.பாலச்சந்தர் இயக்கத்தில் 1975 ஆம் ஆண்டு வெளியான அபூர்வ ராகங்கள் மூலம் தமிழ் சினிமாவில் அறிமுகமான சூப்பர்ஸ்டார் ரஜினிகாந்த், தற்போது லோகேஷ் கனகராஜ் இயக்கத்தில் வெளியாகவுள்ள 'கூலி' திரைப்படம் மூலம் தனது 50 வருட சினிமா வாழ்க்கையை நிறைவு செய்ய உள்ளார். இந்த நிலையில் ரஜினிகாந்த் பற்றி லோகேஷ் கனகராஜ் கொடுத்த பேட்டி இணையத்தில் வைரலாகி வருகிறது

ரஜினி சாரிடம் முதலில், தான் ஒரு கமல் ரசிகர் என கூறியபோது அவர் எதுவும் சொல்லவில்லை, ஆனால் படத்தின் டப்பிங் நடந்து கொண்டிருந்தபோது தனது உதவியாளர்களிடம் பேசிய ரஜினி சார், லோகேஷ் தன்னிடம் கதை சொல்ல வரும்போதே கமல் சார் ரசிகர்னு தான் ஆரம்பிச்சாரு, அவரை நான் ஆடியோ லான்ச்ல பாத்துக்கறேன், என சிரித்து கொண்டே ரஜினிகாந்த் கூறியதாக லோகேஷ் கனகராஜ் தெரிவித்துள்ளார்.

அதுமட்டுமில்லாமல் தனது குடும்பத்தில் அனைவரும் ரஜினி ரசிகர்கள், தான் மட்டும் தான் கமல் ரசிகர். சிறுவயதில் முத்து, படையப்பா படங்களை பார்த்து தானும் ரஜினி ரசிகராக இருந்ததாகவும், தொலைக்காட்சியில் சூப்பர் ஸ்டார் யாருனு கேட்டா பாடல் ஒலியும் ஒளியுமில் வரும்போது தான் உனக்கு சோறே ஊட்ட முடியும் என தனது தாயார் தன்னிடம் கூறியதாக லோகேஷ் குறிப்பிட்டுள்ளார்.

அதன் பின்னர் எப்போது கமல்ஹாசன் நடித்த சத்யா திரைப்படம் பார்த்தேனோ அப்போதில் இருந்து தான் கமல் ரசிகனாக மாறிவிட்டதாகவும் இயக்குனர் லோகேஷ் கனகராஜ் குறிப்பிட்டுள்ளார்.

கமல்ஹாசனை பிடிக்கும் என்பதால் ரஜினிகாந்த் எதோ எதிரி என்றோ அவரை பிடிக்காது என்றெல்லாம் கிடையாது.

கமல் சாரே தன்னிடம், ரஜினிகாந்த்தோடு படம் செய்யும் போது பொறுப்பாக, கவனமாக படம் எடுங்கள் என அறிவுரை கூறியதாகவும், அதனை எல்லாம் நினைவில் வைத்து தான் 'கூலி' திரைப்படத்தை தான் இயக்கி உள்ளதாக லோகேஷ் கனகராஜ் தெரிவித்துள்ளார்.