ஸ்பைஸ்ஜெட் நிறுவனத்திடம் 1,323 கோடி ரூபாய் இழப்பீடு கேட்டு சன் குழுமத்தின் தலைவர் கலாநிதி மாறனும், அவர் நடத்திவந்த KAL ஏர்வேஸ் நிறுவனமும் தாக்கல் செய்த மேல்முறையிட்டு மனுவை உச்சநீதிமன்றம் தள்ளுபடி செய்துள்ளது.

2015-ல் ஸ்பைஸ்ஜெட் நிறுவனம் கடும் நிதிநெருக்கடியில் இருந்தபோது, அந்நிறுவனத்தில் தான் வைத்திருந்த 58.46 சதவீத பங்குகளை ஸ்பைஸ் ஜெட் நிறுவனர் அஜய் சிங்கின் பெயருக்கே கலாநிதி மாறன் மாற்றினார்.

அப்போது, Spice Jet நிறுவனத்தில் தான் முதலீடு செய்திருந்த 679 கோடி ரூபாய்க்கு பதிலாக அந்நிறுவனம் convertible warrants மற்றும் preference பங்குகளை வழங்க வேண்டும் என அஜய் சிங் உடன் தான் ஒப்பந்தம் செய்திருந்ததாகவும், ஆனால் தனக்கு கிடைக்க வேண்டிய பங்குகளை ஸ்பைஸ்ஜெட் நிறுவனம் வழங்க மறுத்துவிட்டதாகவும் குற்றஞ்சாட்டிய கலாநிதி மாறன், 1,323 கோடி ரூபாய் இழப்பீடு கேட்டு 2018-ம் ஆண்டு டெல்லி உயர் நீதிமன்றத்தில் வழக்கு தொடர்ந்தார்.

கலாநிதி மாறன் வைத்த குற்றச்சாட்டை ஸ்பைஸ் ஜெட் நிறுவனம் திட்டவட்டமாக மறுத்திருந்த நிலையில். 2023-ம் ஆண்டு மே மாதம் அந்த வழக்கை டெல்லி உயர் நீதிமன்றம் தள்ளுபடி செய்தது. அதை எதிர்த்து காலநிதி மாறன் தொடர்ந்த மேல்முறையீட்டு மனுவை தற்போது உச்சநீதிமன்றமும் தள்ளுபடி செய்துள்ளது. இதையடுத்து ஸ்பைஸ்ஜெட் நிறுவன பங்குகள் 7 சதவீதம் உயர்ந்துள்ளன.