சென்னை அப்போலோ மருத்துவமனையில் சிகிச்சை பெற்றுவரும் முதலமைச்சர் மு.க. ஸ்டாலின் காணொலிகாட்சி வாயிலாக "உங்களுடன் ஸ்டாலின்" திட்டப் பணிகள் குறித்து ஆலோசனை மேற்கொண்டார்.

கன்னியாகுமரி, காஞ்சிபுரம், கோயம்புத்தூர் ஆகிய மாவட்டங்களின் ஆட்சியர்களிடம் திட்டப் பணிகளின் முன்னேற்றம் குறித்து அவர் ஆய்வு மேற்கொண்டார். முகாம்களில் பெறப்படும் மனுக்களின் விவரங்கள் குறித்தும், அங்கு செய்து தரப்பட்டுள்ள அடிப்படை வசதிகள் குறித்தும் முதலமைச்சர் கேட்டறிந்தார்.

மேலும், முகாம்களில் கலந்துகொண்ட பயனாளிகளிடம் கலைந்துரையாடிய முதலமைச்சர்,அவர்களது கோரிக்கைகள் குறித்த விவரங்களையும் கேட்டறிந்தார். அதனைத் தொடர்ந்து அரசுக் கோப்புகளிலும் அவர் கையெழுத்திட்டார்.

இதனிடையே சமூகவலைதளங்களில் பதிவிட்ட முதலமைச்சர், மருத்துவர்கள் அறிவுறுத்திய ஓய்வுக்குப் பிறகு, விரைவில் மக்களைச் சந்திக்க அவர்களது மாவட்டங்களுக்கு செல்வேன் என்றார்.

முன்னதாக, முதலமைச்சரை 2ஆம் நாளாக மருத்துவமனையில் சென்று நலம் விசாரித்த மு.க.அழகிரி, இன்னும் 2, 3 நாட்களில் மருத்துவமனையில் இருந்து முதலமைச்சர் டிஸ்சார்ஜ் செய்யப்படுவார் என்றார்.

சகோதரர் மு.க. முத்து மறைவால் ஒரு நாள் முழுவதும் முதலமைச்சர் மு.க.ஸ்டாலின் சாப்பிடாமல் இருந்ததாக அமைச்சர் மா.சுப்பிரமணியன் கூறினார். சுமார் ஒன்றரை கிலோ மீட்டர் வரை நடைபயணம் மேற்கொண்டபோது முதலமைச்சருக்கு தலைசுற்றல் ஏற்பட்டதாகவும் அவர் விளக்கம் அளித்தார்.