ஓரணியில் தமிழ்நாடு முன்னெடுப்பில் மக்களிடம் செல்போன் OTP எண்ணை பெற தி.மு.க.வுக்கு உயர்நீதிமன்ற மதுரை அமர்வு தடை விதித்துள்ளது.

தி.மு.க.வினர் 'ஓரணியில் தமிழ்நாடு' என்ற பெயரில் சட்டவிரோதமாக ஆதார் விபரங்களை சேகரிப்பதாகவும், மத்திய அரசு நடவடிக்கை எடுக்க வேண்டும் என்றும் வழக்கு தொடரப்பட்டது. இந்த மனு நீதிபதிகள் எஸ்.எம்.சுப்பிரமணியம், மரிய கிளாட் அமர்வு முன்பாக விசாரணைக்கு வந்தது.

அப்போது மனுதாரர் தரப்பில், "ஆதார் எண், OTP எண்ணை கேட்பது போன்றும், உறுப்பினர் ஆகவில்லை எனில் மகளிர் உரிமைத் தொகை போன்ற சலுகைகள் கிடைக்காது என கூறப்படுவது போன்றும் வீடியோ சமர்ப்பிக்கப்பட்டது.

"OTP விபரங்களை பகிர வேண்டாமென, காவல்துறையினர் அறிவுறுத்தி, வெளிப்படையாக விளம்பரம் செய்தும் எதற்காக திமுகவினர் கேட்கிறார்கள்? என அரசிடம் நீதிபதிகள் கேள்வி எழுப்பினர். இதற்கு உறுப்பினர் சேர்க்கைக்காக தி.மு.க. பிரச்சாரம் செய்வதாக தமிழக அரசு சார்பில் தெரிவிக்கப்பட்டது. அப்போது பேசிய நீதிபதிகள், "நீங்கள் அரசு வழக்கறிஞரா? தி.மு.க. வழக்கறிஞரா? என கேள்வி எழுப்பினர். மேலும், ஆதார் விபரங்களை சேகரிக்கும் தனியார் நிறுவனம் அமெரிக்க நிறுவனத்திற்கு விற்பனை செய்தால் என்ன செய்வது? என்றும் வினவினர்.

உறுப்பினர் சேர்க்கை நடத்தலாம் ஆனால் OTP-ஐ கேட்கக் கூடாது என அறிவுறுத்திய நீதிபதிகள் வழக்கில் இந்திய தேர்தல் ஆணையத்தை தாமாக முன்வந்து நீதிபதிகள் சேர்த்தனர். இதையடுத்து, தனிநபர் தகவல் எவ்வாறு பாதுகாக்கப்படுகிறது? என்பது குறித்து மத்திய, மாநில அரசுகள் பதிலளிக்க உத்தரவிட்டு வழக்கு 2 வாரத்திற்கு ஒத்திவைத்தக்கப்பட்டது.