“எங்க அம்மாவை பாம்பு கடிச்சது அதான்...இந்த கருவியை கண்டுபிடிச்சோம்”.... எனக்கூறி ரூ. 1 லட்சம் பரிசை வென்று, உருகவைத்த கொல்லிமலை அரசுப் பள்ளி மாணவிகள் இவர்கள்தான்...

அன்னாசி பழம் அதிகம் விளையும் நாமக்கல் மாவட்டம் கொல்லிமலையில், அன்னாசி பழத்தை அறுவடை செய்யும் போது, விஷ பூச்சிகள், பாம்புகள் தீண்டி, அங்குள்ள கிராம மக்கள் பல பிரச்னைகளுக்கு இடையே பழத்தை அறுவடை செய்ய வேண்டிய நிலைமை இருந்துள்ளது.

இந்நிலையில், நாமக்கல் மாவட்டம் நத்துக்குழிபட்டி அரசு உயர்நிலை பள்ளியில் 8 ஆம் வகுப்பு பயிலும் சத்யா என்ற மாணவியின் தாய், அன்னாசி பழம் அறுவடை செய்ய செல்லும் போது, கையில் அதன் முள் குத்துவது, பாம்பு, விஷ பூச்சிகள் கடிப்பது போன்ற பல பிரச்னைகளுக்கு ஆளாகி வந்துள்ளதாக வேதனையோடு சுட்டிக்காட்டுகிறார்.

அப்போது, தன் மனதில் தோன்றிய சிந்தனையால், சக மாணவிகளின் ஒத்துழைப்போடு புதிய அன்னாசி பழம் அறுவடை கருவியை கண்டுபிடித்தது மட்டுமல்லாமல், இரவில் செல்லும் போது பேட்டரியால் வெளிச்சம் தெரியும் அளவில் LED லைட்டுகளையும் அமைத்து அசத்தியுள்ளனர்.

இதையடுத்து., சென்னை அண்ணா பல்கலை.யில் தமிழ்நாடு குறு, சிறு மற்றும் நடுத்தர தொழில் நிறுவனங்கள் மூலம் நடத்தப்பட்ட தொழில் முனைவோர் மேம்பாடு மற்றும் புத்தாக்க நிறுவனம் கண்காட்சியில் பள்ளி மாணவ, மாணவிகளின் படைப்புகளில் ஒன்றான , அன்னாசி பழம் புதிய அறுவடை கருவியை கண்டு பிடித்த கொல்லி ஹில்ஸ் மாணவிகளின் கருவிக்கு முதல் பரிசு ஒரு லட்சம் ரூபாயை, அமைச்சர் தா.மோ. அன்பரசன் வழங்கினார்.

தாங்கள் வாழும் பகுதிகளில் தங்களது பெற்றோர், உற்றார் உறவினர்கள் படும் பாட்டை மனதில் கொண்டு புதிய கருவியை உருவாக்கிய மாணவிகளுக்கு பாராட்டுகள் குவிந்து வருகின்றன.