அம்மனுக்கு உகந்த ஆடி மாதம் துவங்கியுள்ள நிலையில், பட்டி தொட்டியெல்லாம் ஒலிக்கவிருக்கும் பாடகி எல்.ஆர்.ஈஸ்வரியின் பக்திப் பாடல்கள் குறித்து இந்தத் தொகுப்பில் காணலாம்...

அம்மனுக்கு எத்தனை பக்திப் பாடல்கள் வந்தாலும், இரண்டு மூன்று தலைமுறையாக, எல்.ஆர். ஈஸ்வரியின் குரல்தான் ஆடி மாதத்தில் ஆட்சி செலுத்திக் கொண்டிருக்கிறது என்று சொன்னால் அது மிகையாகாது.

குழுவில் ஒருவராக கோரஸ் பாடிக் கொண்டிருந்த எல்.ஆர்.ஈஸ்வரியைத் தனிப் பாடகராக கொண்டு வந்தவர் கே.வி.மகாதேவன்.

விஸ்வநாதன் - ராமமூர்த்தி இசையில் ‘பாச மலர்' படத்தின் 'வாராயோ தோழி வாராயோ' பாடல் மூலம் தனித்து அடையாளம் காணப்பட்டார் எல்.ஆர். ஈஸ்வரி. அக்கால கிளப் டான்ஸ் பாடல்களில் கலக்கத் தொடங்கினார்.

லூர்து மேரி ராஜேஸ்வரியான எல்.ஆர்.ஈஸ்வரி சினிமா பாடல்களில் முத்திரைப் பதித்ததோடு மட்டுமின்றி, பக்திப் பாடல்களைப் பாடி தனி ஆவர்த்தனம் நடத்தத் தொடங்கினார்.

அம்மன் பாடல்கள் வழியாக இன்றளவும் ரசிகர்கள் மனதில் எல்.ஆர்.ஈஸ்வரி நீக்கமற நிறைந்திருக்கின்றார் என்றால் அது மிகையாகாது.