கோவை விமான நிலையத்தில் ரெட் கால் டாக்ஸியை புக் செய்து விட்டு அது சி.என்.ஜியில் இயங்குவது தெரிந்ததும் கேன்சல் செய்த வாடிக்கையாளரை , டாக்ஸி ஓட்டுனர் ஆபாசமாக பேசி மிரட்டல் விடுத்த சம்பவம் பரபரப்பை ஏற்படுத்தி உள்ளது.

கோவை விமான நிலையத்துக்கு நாள்தோறும் ஏராளமான பயணிகள் வந்து செல்கின்றனர். இந்நிலையில் விமானப் பயணி ஒருவர் கோவை விமான நிலையத்தில் இருந்து ரெட் கால் டாக்ஸி நிறுவனத்தில் கார் புக் செய்து உள்ளார். அங்கு வந்த ரெட் டாக்ஸி ஒன்றின் ஓட்டுனர் அந்தப் பயணி பதிவு செய்த தொலைபேசி எண்ணுக்கு அழைத்து, வாகனம் வந்து விட்டதாக தெரிவித்து உள்ளார்.

இந்நிலையில் அந்த காரில் விமானப் பயணி தனது மனைவியுடன் ஏறும்போது காரில் கேஸ் வாசனை வந்து உள்ளது. இது குறித்து ஓட்டுநரிடம் கேள்வி எழுப்பிய பயணி தனக்கு இந்த வாகனம் வேண்டாம் என்று கூறி டாக்ஸியை விட்டு இறங்கியதோடு டாக்ஸியை கேன்சல் செய்து உள்ளார்.

இதில் ஆத்திரமடைந்த ரெட் கால் டாக்ஸி ஓட்டுநர் ஆத்திரம் அடைந்து நீங்கள் பதிவு செய்யும் போது அப்படி கூறியிருக்க வேண்டும், ஏன் ? அப்படி பதிவு செய்யவில்லை என்று கூறி தகராறில் ஈடுபட்டார்.

பயணி ஒரு வார்த்தை கூட எதிர்த்து பேசாத நிலையில் , ஓட்டுனர் ஆபாச வார்த்தைகளால் பேசி கொலை மிரட்டல் விடுத்தார்.

அந்த ரெட் டாக்ஸி ஓட்டுனரில் வாயில் இருந்து வார்த்தைகள் பச்சை பச்சையாக வருவதை கண்ட சக பயணி ஒருவர் இதனை வீடியோ பதிவு செய்தார்

தன்னை யாராலும் ஒன்றும் செய்ய முடியாது என்றும் காரை விட்டு ஏற்றி கொலை செய்து விடுவேன் என்றும் ஏகத்துக்கும் எகத்தாளமாகவும், அடாவடியாகவும் அந்த டாக்ஸி ஓட்டுனர் பேசினார்

இதனால் செய்வது அறியாத இருந்த பயணி இது குறித்து தொலைபேசியில் யாரையோ தொடர்பு கொள்ள முயற்சி செய்து கொண்டு இருந்தார்

இதனால் சிறிது நேரம் கோவை விமான நிலையத்தில் பரபரப்பு ஏற்பட்டது. சமூக வலைதளங்களில் இந்த வீடியோ வெளியான நிலையில் பயணிக்கு பகிரங்க கொலை மிரட்டல் விடுத்த ரெட் டாக்ஸி ஓட்டுனரை போலீசார் தேடி வருகின்றனர்.