இந்திய அரசியலில் பிரதமர்களை உருவாக்கிய கிங் மேக்கர் என்று வர்ணிக்கப்பட்ட கர்மவீரர் காமராஜருக்கு இன்று 123வது பிறந்தநாள். நேர்மை, தியாகம், தன்னலம் இல்லா உழைப்பு என அருந்தொண்டாற்றிய தலைவரை நினைவுகூர்கிறது இந்த செய்தித் தொகுப்பு...

கரிசல் காடும், கருவேல மரமும், காகமும், கரிச்சான் குருவிகளும் கொண்ட தென் தமிழகத்தின் அன்றைய காலத்தில் அதிகம் அறியப்படாத விருதுபட்டியில் பிறந்தவர் காமராசர். சிறுவயதிலிருந்தே விடுதலைப் போராட்டத்திலும், பொதுத் தொண்டிலும் தம்மை ஈடுபடுத்திக் கொண்டார்.

ஆங்கிலேயருக்கு எதிரான போராட்டங்களில் பங்கேற்று 9 ஆண்டுகள் சிறையில் கழித்தார். ராஜாஜிக்குப் பிறகு 1954ம் ஆண்டில் தமிழகத்தின் முதலமைச்சராகப் பொறுப்பேற்றார் காமராஜர். ராஜாஜியின் குலக்கல்வித் திட்டத்தால் மூடப்பட்ட 6 ஆயிரத்திற்கும் மேற்பட்ட பள்ளிகளைத் திறக்கச் செய்தார்.

ஆரம்ப பள்ளிகளின் எண்ணிக்கை பத்தே ஆண்டுகளில் 5 மடங்கு உயர்ந்தது. தனக்கு வாய்க்காத கல்வியை, ஏழைக் குழந்தைகளும் இழந்து விடக்கூடாது என்ற பேராவலுடன் திரும்பிய திசையெங்கும் கல்வி நிலையங்களைத் திறந்தார் அவர். அதோடு நின்று விடாமல் பள்ளிக் குழந்தைகளுக்கு இலவச மதிய உணவுத் திட்டத்தையும் செயல்படுத்திய செயல் வீரர் காமராஜர்.

நெய்வேலி நிலக்கரித் திட்டம், பெரம்பூர் ரயில் பெட்டி தொழிற்சாலை, திருச்சி பாரத் ஹெவி எலக்ட்ரிக்கல்ஸ், கல்பாக்கம் அணு மின்நிலையம், சேலம் இரும்பு உருக்கு ஆலை, பாரத மிகு மின் நிறுவனம், பெரம்பூர் இரயில் பெட்டித் தொழிற்சாலை உள்பட மேலும் பல தொழிற்சாலைகளை உருவாக்கி, அன்றைய காலகட்டத்தில் படித்தவர்கள், படிக்காதவர்கள் என லட்சக்கணக்கான இளைஞர்களுக்கு வேலைவாய்ப்பினை வாரி வழங்கினார் காமராசர்.

இதனால் அவரின் ஆட்சியின் இறுதியில், தமிழகம் தொழில் வளத்தில் பிற மாநிலங்களைப் பின்னுக்குத் தள்ளி, இரண்டாம் இடத்தைப் பிடித்தது. மணிமுத்தாறு, அமராவதி, வைகை, சாத்தனூர், கிருஷ்ணகிரி, ஆரணியாறு ஆகிய ஆறுகளின் குறுக்கே அணைகளைக் கட்டி நீரியல் மேலாண்மைக்கு வித்திட்டவர் காமராசர்.

கன்னியாகுமரி நெய்யாறு திட்டம், கோவை பரம்பிக்குளம் - ஆழியாறு திட்டம், பவானி அணை என வரலாற்றில் பொன்னெழுத்துக்களால் பொறிக்கப்படும் நீர்ப்பாசன திட்டங்களையும் வடிவமைத்து பாசனத் திட்டங்களுக்கு முன்னோடித் தலைவராக இருப்பவரும், இருந்தவரும் காமராசர்தான்.

பிரதமர் பதவி தம்மைத் தேடி வந்தபோதும், லால் பகதூர் சாஸ்திரியையும், இந்திராவையும் பிரதமராக்கி கிங் மேக்கராக வலம் வந்தவர் காமராசர். அரசியல் வாழ்க்கையில் அப்பழுக்கற்றவராக ஒருவர் இருக்க முடியும் என்பதற்கு உதாரணமாகத் திகழ்ந்த காமராசரை, அவரது 123-வது பிறந்தநாளில் நினைவு கூர்வோம்