வனிதா விஜயகுமார், நடன இயக்குநர் ராபர்ட் இணைந்து நடித்திருக்கும் மிசஸ் அண்ட் மிஸ்டர் படத்தில் இளையராஜாவின் சிவராத்திரி பாடலை பயன்படுத்தி இருப்பதற்கு இழப்பீடு கேட்டு இளையராஜா நோட்டீஸ் அனுப்பி இருந்த நிலையில், கடவுள் தன் மீது கோபித்துக் கொண்டதாக வனிதா விஜயகுமார் கண்ணீர் விட்டு அழுதார்..

தமிழ் திரை உலகில் சர்ச்சைகளுக்கு பெயர் பெற்ற நடிகை வனிதா விஜயகுமார். அவரது மகள் ஜோவிகா தயாரிப்பில் நடன இயக்குனர் ராபர்ட் உடன் வனிதா விஜயகுமார் மிஸஸ் அண்ட் மிஸ்டர் என்ற படம் ஒன்றில் நடித்திருந்தார்.

அந்தப் படத்தில் மைக்கேல் மதன காமராஜன் படத்தில் இடம்பெற்ற சிவராத்திரி என்ற பாடல் பயன்படுத்தப்பட்டிருந்தது.

தனது அனுமதி இல்லாமல் அந்தப் பாடல் பயன்படுத்தப்பட்டிருப்பதாக கூறி இசையமைப்பாளர் இளையராஜா வனிதா விஜயகுமாரிடம் இழப்பீடு கேட்டு நோட்டீஸ் ஒன்றை அனுப்பி இருந்தார்.

இதுகுறித்து செய்தியாளர்கள் வனிதாவிடம் கேள்வி எழுப்பினர், இதற்கு மிகவும் உணர்ச்சிவசப்பட்ட நிலையில் பேச ஆரம்பித்த வனிதா தான் இளையராஜாவை கடவுளாக பார்ப்பதாகவும் அவரை நேரில் சந்தித்து இந்த படத்தில் தங்களது படத்தில் உள்ள பாடலை பயன்படுத்தி இருப்பதை சொல்லி அவரிடம் ஆசீர்வாதம் வாங்கியதாகவும் இந்த பாடலில் உரிமம் வைத்திருக்கும் சோனி மியூசிக் நிறுவனத்திடம் முறையான அனுமதி பெற்ற பின்னரே படத்தில் பயன்படுத்தியதாகவும் விளக்கம் அளித்தார்.

இப்படிப்பட்ட சூழ்நிலையில் அவர் தனக்கு நோட்டீஸ் அனுப்பி இருப்பது அந்த கடவுளே தன் மீது கோபம் கொண்டு விட்டதாக கூறி கண்ணீர் சிந்தினார்.

தொடர்ந்து பேசிய வனிதா, தான் இளையராஜா குடும்பத்திற்கு மிகவும் நெருக்கமாக இருந்ததாகவும் அவரது மனைவியின் கையில் இருந்து பீரோ சாவியை வாங்கி நகைகளை எடுத்து சாமிக்கு அணிவித்து வீட்டில் ஒருத்தியாக இருந்த காலங்களை நினைவு கூறினார் .

எல்லாத்துக்கும் உச்சமாக தான் இளையராஜா குடும்பத்தில் மருமகளாக போக வேண்டியவர் என்றும் கூறி இந்த பிரச்சனைக்கு வனிதா முற்றுப்புள்ளி வைத்தார்.

மேலும் தாங்கள் கஷ்டப்பட்டு படம் தயாரித்து இருப்பதாகவும் அனைவரும் ஒருமுறையாவது குடும்பத்துடன் வந்து பார்க்க வேண்டும் என்றும் வனிதா மிகுந்த சோகத்துடன் கேட்டுக் கொண்டார்

ஏற்கனவே மஞ்சு மேல் பாய்ஸ், குட் பேட் அக்ரி உள்ளிட்ட பல்வேறு படங்களுக்கு தனது பாடல்களை பயன்படுத்தியதற்கு ராயல்டி கேட்டு இசைஞானி இளையராஜா நோட்டீஸ் அனுப்பி இருப்பது குறிப்பிடத்தக்கது.