தமிழகத்தை மீட்போம், மக்களை காப்போம் என்ற தலைப்பில், அதிமுக பொதுச்செயலாளர் எடப்பாடி பழனிசாமி, தமிழ்நாடு முழுவதும் சட்டமன்ற தொகுதிகள் வாரியாக தனது தேர்தல் பிரச்சார சுற்றுப்பயணத்தை தொடங்கியுள்ளார். முதற்கட்ட சுற்றுப்பயணத்தை முன்னிட்டு, கோயம்புத்தூர் மாவட்டம் மேட்டுப்பாளையம் தொகுதிக்கு உட்பட்ட தேக்கம்பட்டி வனபத்ரகாளியம்மன் கோவிலில் சுவாமி தரிசனம் செய்தார்.

இதனைத் தொடர்ந்து, மேட்டுப்பாளையம் சாலை மண்டபம் பகுதியில், விவசாயிகள், நெசவாளர்கள் மற்றும் செங்கல் சூளை உரிமையாளர்களுடன் கலந்துரையாடினார்.

அப்போது, அதிமுக ஆட்சியில், அணைகளிலிருந்து வெளியேறும் உபரிநீரை, ஏரிகளுக்கு கொண்டு செல்லும் திட்டத்தை திமுக அரசு கிடப்பில் போட்டுவிட்டதாக இ.பி.எஸ் குற்றம்சாட்டினார். விவசாயிகள் நலனை கருத்தில் கொண்டு உயரமாக அமைக்க திட்டமிட்ட தடுப்பணைகளின் உயரத்தையும், திமுக அரசு குறைத்துவிட்டதாகவும் எடப்பாடி பழனிசாமி தெரிவித்தார். இருப்பினும், அதிமுக மீண்டும் ஆட்சியமைக்கும்போது, விவசாயிகளின் கோரிக்கை நிறைவேற்றப்படும் என, இ.பி.எஸ் உறுதியளித்தார்.

அதிமுக ஆட்சியில் நெசவாளர்களுக்கு இன்சூரன்ஸ், மருத்துவ காப்பீடுகள் செய்து தரப்பட்டதாகவும் ஆனால் திமுக ஆட்சியில் நிறுத்தப்பட்டதாக நெசவாளர்கள் சார்பில் பேசியவர்கள் இபிஎஸ்சிடம் எடுத்துரைத்தனர். இதே போல் திமுக ஆட்சிக்கு வந்ததும் சமூக ஆர்வலர்கள் என்ற பெயரில் வழக்கு போட்டு சிலர் செங்கல் சூளைகளை மூட வைத்துவிட்டதாக செங்கல் உற்பத்தியாளர்கள் குற்றஞ்சாட்டினர்.