திருப்புவனம் இளைஞர் அஜீத்குமார் அடித்துக் கொலை செய்யப்பட்டது தொடர்பாக சிறப்புப்படை தலைமைகாவலர் கண்ணன், காவலர்கள் ராஜா, பிரபு , ஆனந்த், சங்கரமணிகண்டன் ஆகிய 5 பேர் கைது செய்யப்பட்டு சிறையில் அடைக்கப்பட்டுள்ளனர். சென்னை உயர் நீதிமன்ற மதுரை கிளையின் உத்தரவுப்படி இந்த லாக் அப் டெத் சம்பவம் தொடர்பாக மாவட்ட நீதிபதி ஜான் சுந்தர் லால் விசாரணை நடத்தி வருகின்றார். 2 வது நாளாக நடந்த விசாரணையின் போது அஜீத்துடன் பணியில் இருந்த ஊழியர்கள் நீதிபதி முன்பு ஆஜராகி அஜீத்துக்கு நிகழ்ந்த கொடுமை குறித்து சாட்சியம் அளித்தனர்

நீதிபதியிடம் சாட்சியம் அளித்த அஜீத்தின் தாய் மாலாதி , சம்பவத்தன்று அஜீத்தை சட்டை இல்லாமல் நிறுத்தி வைத்திருந்ததாக தெரிவித்தார்

அஜீத்தை 3 காவலர்கள் கடுமையாக தாக்கியதை நேரில் பார்த்ததாக தெரிவித்தும் தன்னை சாட்சியாக சேர்க்கவில்லை என்று அதிருப்தி தெரிவித்த உறவினர் மனோஜ்பாபு என்பவர், “அஜீத்தை கஞ்சா குடிக்க வைத்து நெஞ்சில் காலால் ஏறி மிதித்தனர்” என்றும் “அஜீத்தின் உயிர் அங்கே போய்விட்டது” என்றும் திடுக்கிடும் தகவல்களை தெரிவித்தார்

இதற்கிடையே அஜீத் தாக்கப்படுவதை வீடியோ எடுத்த தன்னை பற்றி தவறான தகவல் பரப்பபடுவதாகவும், காவலர் ராஜாவுடன் நெருக்கமாக உள்ள ரவுடி ஒருவரிடம் இருந்து மிரட்டல் வருவதாகவும் இளைஞர் சத்தீஸ்வரன் புகார் தெரிவித்தார்.

சத்தீஸ்வரனின் புகாரை தொடர்ந்து அவருக்கு துப்பாக்கி ஏந்திய போலீஸ் பாதுகாப்பு வழங்கப்பட்டது. அவருடன் 2 போலீசார் சுழற்சி முறையில் பாதுகாப்பு பணியில் ஈடுபடுவார்கள் என்று டிஐஜி மூர்த்தி தெரிவித்தார். அடுத்தடுத்து இந்த சம்பவம் தொடர்பாக வெளியாகும் தகவல்கள் காவலர்கள் அஜீத்திடம் எவ்வளவு கொடுமையாக நடந்துள்ளனர் என்று ஆதங்கம் கொள்ள செய்கின்றது.