இன்றைய காலக்கட்டத்தில், ஹோட்டலுக்கு செல்லாமல் ஆன்லைனிலேயே ஆர்டர் செய்து உணவு சாப்பிடுவது வழக்கம் ஆகிவிட்டது. அதுவும், இளைஞர்கள் மட்டுமல்ல, பெரும்பாலானவர்கள் ஆன்லைன் மூலமாக உணவுகளை ஆர்டர் செய்கிறார்கள். இதுபோன்ற ஆன்லைன் நிறுவனங்கள் ஹோட்டல்களிடம் அதிக கமிஷன் தொகை வாங்குவதாக நீண்ட நாட்களாகவே குற்றச்சாட்டு தொடர்கிறது. இந்தநிலையில்தான், கமிஷனை குறைக்கவில்லை என்றால் சென்னையில் ஆன்லைன் டெலிவரி நிறுவனங்களுக்கு உணவு கொடுக்கப்போவதில்லை என ஹோட்டல் உரிமையாளர்கள் அறிவித்திருப்பது, பரபரப்பை ஏற்படுத்தியுள்ளது. இதற்கு என்ன காரணம்? ஆன்லைன் உணவு டெலிவரி நிறுவனங்கள் எவ்வளவு தொகையை கமிஷனாக பெறுகின்றனர்? ஆன்லைன் மூலமாக விற்பனை செய்யக்கூடிய உணவுகளின் விலை ஏன் அதிகமாக உள்ளது? என்பது குறித்து விளக்குகிறது இந்த செய்தி தொகுப்பு...

உணவு விற்பனை செய்யும் கடைகளின் எண்ணிக்கை மற்றும் அவற்றின் தரநிலை ஆகியவற்றை அடிப்படையாகக் கொண்டு கமிஷன் தொகையை ஆன்லைன் உணவு விநியோக நிறுவனங்கள் நிர்ணயம் செய்வதாக சொல்லப்படுகிறது. 


அதிக ஆர்டர்கள் பெரும் ஹோட்டல்கள் அல்லது உணவு நிறுவனங்களுக்கு 30% முதல் 40% வரை கமிஷன் தொகை நிர்ணயிக்கப்படுகிறது.

அதேபோல, குறைந்த அளவு விற்பனை நடைபெறும் ஹோட்டல்கள் அல்லது உணவு நிறுவனங்களுக்கு 20 % முதல் 30 சதவீதம் வரை கமிஷன் தொகை நிர்ணயிக்கப்படுகிறது.

சென்னை, மதுரை, கோவை, திருச்சி உள்ளிட்ட பெரு நகரங்களில் இருக்கும் கடைகளில் நடைபெறும் விற்பனையை பொறுத்து 40 சதவீதம் வரை கமிஷன் தொகை நிர்ணயம் செய்யப்படுவதாக கூறப்படுகிறது.


நேரடியாக கடையில் விற்பனை செய்யப்படும் பொருளின் விலை 100 ரூபாய் என்றால், நிர்ணயிக்கப்படும் கமிஷன் தொகையைப் பொறுத்து, கூடுதலாக விலை வைத்து ஆன்லைன் உணவு விநியோக நிறுவன வலைதளத்தில் அதன் விலை பதிவேற்றம் செய்யப்படுகிறது.

உதாரணத்திற்கு, ஒரு சிக்கன் ரைஸ் விலை கடையில் 100 ரூபாய் என்றால், ஆன்லைன் விற்பனையில் 150 ரூபாயாக காண்பிக்கும். 40% கமிஷன் போக மீதம் இருக்கும் தொகை ஹோட்டல்களுக்கு ஆன்லைன் உணவு நிறுவனத்தின் மூலம் கொடுக்கப்படும். அதிலும், 18 சதவீத ஜிஎஸ்டியை ஹோட்டல் நிறுவனமே செலுத்த வேண்டும். அதாவது, கமிஷன் போக மீத தொகை ஹோட்டல்களுக்கு கொடுக்கப்பட்டாலும் அந்த வாரம் முழுவதும் நடைபெற்ற முழு விற்பனை தொகைக்குமான ஜிஎஸ்டியை ஹோட்டல் செலுத்த வேண்டும் என ஹோட்டல் உரிமையாளர்கள் கூறுகின்றனர்.

இதனால்தான், கடைகளில் நேரடியாக விற்பனை செய்யப்படும் உணவிற்கும் ஆன்லைன் வாயிலாக விற்பனை செய்யப்படும் உணவிற்கும் இடையேயான விலை மாற்றம் உருவாகிறது என தெரிவிக்கின்றனர்.

ஆன்லைனில் உணவு விற்பனை செய்வதால் ஹோட்டல் நிறுவனத்திற்கு லாபம் பெரிதாக கிடைக்கவில்லை எனவும் 100 ரூபாய்க்கு வாங்க வேண்டிய பொருளை 150 ரூபாய்க்கு பொதுமக்களும் வாங்கும் சூழல் உருவானது.


மேலும் ஆன்லைன் உணவு நிறுவனங்கள் ஹோட்டல் உரிமையாளர்களுக்கு தெரியாமலேயே மறைமுகமாகவும் அவர்களிடமிருந்து தொகையை வசூல் செய்வதாகவும் குற்றச்சாட்டு எழுந்துள்ளது.

சில ஹோட்டல் முதலாளிகளிடம் உணவு விலையில் ஆஃபர் கொடுக்கப்பட்டுள்ளது என்று ஒரு மெயிலை மட்டும் அனுப்பி அதற்கு பதில் (yes or no) எதிர்பார்க்கின்றனர். ஆனால், பதில் சொல்லவில்லை என்றால் அந்த ஆஃபரை அமல்படுத்தி விற்பனை அதிகரித்தால் அதற்கான தொகையையும் ஹோட்டல் உரிமையாளர்களிடமிருந்து ஆன்லைன் உணவு விநியோக நிறுவனங்கள் பெற்றுக் கொள்கின்றன என கூறப்படுகிறது.

இந்தநிலையில், நாமக்கல் ஹோட்டல் அசோசியேஷன் ஆன்லைன் விற்பனையை நிறுத்தியுள்ள நிலையில், தமிழ்நாடு ஹோட்டல் அசோசியேஷன் சார்பில் சென்னை மாவட்ட நிர்வாகிகளும், ஆன்லைன் உணவு விற்பனை நிறுவனத்துடன் கமிஷன் தொகையை குறைக்க கூறி பேச்சுவார்த்தையில் ஈடுபட்டு வருகின்றனர், என்பது குறிப்பிடத்தக்கது.

பாலிமர் செய்திகளுக்காக சென்னை செய்தியாளர் பாண்டியராஜன்...