திருப்புவனம் அருகே இளைஞர் அஜீத்குமாரை அடித்து கொலை செய்ததாக 5 போலீசார் கைது செய்யப்பட்டுள்ள நிலையில் கோவிலில் வீல் சேர் எடுக்கும் போதே 500 ரூபாய் கேட்டதால் அஜீத்குமாருடன் பிரச்சனை ஏற்பட்டதாக பெண் மருத்துவர் தெரிவித்த வீடியோ வெளியாகி உள்ளது.

சிவகங்கை மாவட்டம் திருப்புவனம் மடப்புரம் பத்ர காளியம்மான் கோவில் காவலாளியான இளைஞர் அஜீத்குமார் அடித்து கொலை செய்யப்பட்டதாக 5 போலீசார் கைது செய்யப்பட்டனர்.

இந்த நிலையில் அஜீத்குமாரின் தரப்பில் நாம் தமிழர் கட்சியின் சார்பாக சென்னை உயர் நீதி மன்ற மதுரை கிளையில் ஆஜரான வழக்கறிஞர் தீரன் கூறும் போது , நகை திருடியதற்காக இந்த தாக்குதல் நடத்தப்பட விலை என்றும் அதற்கு முன்பாக அந்த பெண் மருத்துவருடன் வந்த மூதாட்டிக்கு வீல் சேர் எடுத்து கொடுத்ததற்காக 500 ரூபாய் டிப்ஸ் கேட்டதால் அந்த பெண் அஜீத்குமாரிடம் தகராறு செய்ததாகவும், அதன் காரணமாகவே நகை திருட்டு புகார் கொடுக்கப்பட்டதாகவும் கூறினார்

சமூக வலைதள வீடியோவை பார்த்து போலீசார் விசாரணை மேற்கொண்டதாக கூறிய நிலையில், சம்பவத்தன்று அந்த பெண் புகார் தெரிவிப்பது போன்று பதிவு செய்யப்பட்ட வீடியோ வெளியானது.

அதில் தனது காரில் இருந்த நகை காணாமல் போனதை விரிவாக கூறிவிட்டு , வீடியோவின் இறுதியில் முன்னதாக அஜீத்குமாருக்கும், தனக்கும் 500 ரூபாய் பணம் கேட்டதால் உண்டான பிரச்சனையையும் மருத்துவர் நிக்கிதா சுருக்கமாக கூறி இருந்தார்

மதுரை மாவட்ட நீதிபதியின் விசாரணை அறிக்கை 8 ஆம் தேதி வெளியாகும் போது, போலீசாருக்கு அழுத்தம் கொடுத்த ஐ.ஏ.எஸ் அதிகாரி, 500 ரூபாய் பிரச்சனையின் உண்மையான பின்னணி என அனைத்து சந்தேகங்களுக்கும் பதில் கிடைக்கும் என்று எதிர்பார்க்கப்படுகின்றது.