பெரிய தொழில், பெரிய வணிக நிறுவனங்களுக்கு 3 புள்ளி 16 சதவீதத்துக்கு மிகாமல் மின்கட்டணம் உயர்த்தப்படும் என்று போக்குவரத்து மற்றும் மின்சாரத்துறை அமைச்சர் சிவசங்கர் தெரிவித்துள்ளார்.

அவர் விடுத்துள்ள அறிக்கையில், தற்போதுள்ள அனைத்து இலவச மின்சார சலுகைகளும் தொடரும் என்றும், வீட்டு மின் இணைப்புகளுக்கு மின் கட்டண உயர்வு இல்லை என்றும் அவர் கூறியுள்ளார்.

500 யூனிட் வரை பயன்படுத்தும் சிறுவணிகர்களுக்கும், குடிசை மற்றும் குறு தொழில்களுக்கும், விசைத்தறி நுகர்வோருக்கும் மின்கட்டண உயர்வும் இல்லை என்றும், உயர்த்தப்பட்ட மின்கட்டணத்தை தமிழக அரசே மானியமாக வழங்குவதாகவும் அமைச்சர் தெரிவித்துள்ளார்.

பெரிய தொழில், பெரிய வணிக நிறுவனங்கள் மற்றும் பிறவகை கட்டண பிரிவுகளுக்கு தமிழ்நாடு மின்சார ஒழுங்குமுறை ஆணையம் நிர்ணயித்துள்ளவாறு 3.16 சதவீதத்துக்கு மிகாமல் மின்கட்டணம் உயர்த்தப்படும் என்றும் அமைச்சர் கூறியுள்ளார்.