விருதுநகர் மாவட்டம் வத்திராயிருப்பு அருகே உள்ள கூமாபட்டி கிராமத்தை ஐலாண்டு என்று வீடியோ எடுத்து இன்ஸ்டாகிராமில் பதிவிட்டவரை நம்பி சுற்றிப்பார்க்க சென்றவர்கள் ஏமாற்றம் அடைந்தனர்.

5 ஆண்டுகளாக தடை விதிக்கப்பட்ட அணையில் திருட்டுதனமாக குளித்து வீடியோ பதிவிட்டவரால் உண்டான ஏமாற்றம் குறித்து விவரிக்கின்றது இந்த செய்தித்தொகுப்பு..

ஊருக்குள்ள நரி வருவதே தப்பு... அதுவும் ஊளையிட்டுகிட்டே வந்தா ஊராருக்கு தெரிஞ்சி அடிச்சி விரட்டி விடமாட்டாங்காளா என்ன ? அது போல ஒரு சம்பவத்தை தான் இந்த இன்ஸ்டாகிராமில் ஊளையிட்ட கூமாபடி தம்பி செய்திருக்கிறார்..!

விருதுநகர் மாவட்டம் வத்திராயிருப்பு அருகே உள்ளது கூமாபட்டி என்கிற அழகிய குக்கிராமம். மலையடிவார கிராமமான இங்கு விவசாயம் தான் பிரதான தொழில். இந்த கிராமத்தையொட்டி பொதுப்பணித்துறையின் கட்டுப்பாட்டில் உள்ள பிலவக்கல் அணை உள்ளது.

மலையடிவாரத்தில் தேங்கியுள்ள இந்த அணையில் உள்ள நீரில் குளிப்பதற்கு 5 வருடத்துக்கு முன்பே தடை விதிக்கப்பட்டது. இந்த விவரம் தெரிந்திருந்தும் அதனை மறைத்து விட்டு இந்த ஊரைச்சேர்ந்த தங்கப்பாண்டி என்ற இளைஞர் இந்த அணைக்கட்டு பகுதியில் திருட்டுத்தனமாக குளித்ததோடு அதனை வீடியோவாக எடுத்து இன்ஸ்டாகிராமில் பதிவிட்டு வந்தார்

“சும்மா இல்லீங்க.. ஏங்கன்னு ஒரு சவுண்டோட தான் இவரு வீடியோவே ஸ்டார்ட் ஆகும்...” “கூமாபட்டியை ஐலாண்டு” என்றும், கூமாட்டியோட இயற்கை அழகிடம் காஷ்மீர் தோற்றுவிடும் என்றும் குற்றாலம் விழுந்துவிடும் என்றெல்லாம் வாய்க்கு வந்ததை எல்லாம் அடித்து விடுவது தங்கபாண்டியின் வாடிக்கை..!

அந்த வகையில் அண்மையில் அவர் பதிவிட்ட வீடியோவில் “ஏங்க.. லவ் பெயிலியரா கூமாபட்டிக்கு வாங்க.. சும்மா ரிலாக்ஸா இருக்கலாம்” என்று தங்கப்பாண்டி கூவி அழைத்த வீடியோ இன்ஸ்டாவில் டிரெண்டிங் ஆனது.

இதனை தொடர்ந்து தமிழ்நாடு மேப்பில் இல்லாத கூமாபட்டியை தேடி பைக்கை எடுத்துக் கொண்டு கூகுள் மேப் உதவியோடு சுற்றுலா விரும்பிகள் படையெடுக்க தொடங்கினர்.

ஊரை சுற்றி மலை இருந்தாலும் குளிக்க அணையும் இல்ல , அணை நீரில் குளிக்க அனுமதியும் இல்லை என்பதை அறிந்து பல கிலோ மீட்டர் பயணித்தவர்கள் ஏமாற்றம் அடைந்தனர். இதனை அங்கே காத்திருந்த தங்கபாண்டியே அவர்களிடம் சொன்னது தான் ஹைலைட்..!

வார இறுதி நாட்களில் கூமாபட்டியை தேடி கும்பல் கும்பலாக கட்டுச்சோத்துடன் சுற்றுலா விரும்பிகள் படையெடுத்து விடகூடாது என்று உஷாரான பொதுப்பணித்துறை பொது அறிவிப்பு ஒன்றை வெளியிட்டது. அதில் கூமாபட்டி சிறிய ஊர் அங்குள்ள பிலவக்கல் அணையில் குளிக்க கடந்த 5 ஆண்டுகளாக தடை செய்யப்பட்டுள்ளது. அங்கு செல்வதை தவிர்க்கவும் என்றும் அணையை சுற்றிபார்க்க அனுமதி இல்லை என்றும் கூறி உள்ளனர்.

இதையடுத்து இன்ஸ்டாவில் வீடியோ வெளியிட்ட தங்க பாண்டி, அரசு அதிகாரிகள் 5 ஆண்டுகளாக அணையை பராமரிக்கவோ சுற்றுலா வசதிகளை பெருக்கவோ நடவடிக்கை எடுக்கவில்லை என்று ஆதங்கம் தெரிவித்துள்ளார்

இதில் மற்றொரு ஹைலைட் என்ன வென்றால் இவ்வளவு நாளும் திருட்டுத்தனமாக குளித்து இன்ஸ்டாவில் வீடியோ பதிவிட்ட தங்கபாண்டியும் இனி அந்த நதிக்கரை ஐலாண்டுக்கு குளிக்க செல்ல முடியாது என்பது தான்..! இருந்த ஒரே வழியையும் பொதுப்பணித்துறை அடைத்து விட்டதாக கூறப்படுகின்றது.