திருவண்ணாமலை மாவட்டம் ஆரணி அருகே படவேடு ரேணுகாம்பாள் கோயில் உண்டியலில் 4 கோடி ரூபாய் மதிப்புள்ள சொத்து பத்திரத்தை முன்னாள் ராணுவ வீரர் காணிக்கையாக செலுத்திய நிலையில் தந்தை மீது மகள்கள் பரபரப்பு புகார் தெரிவித்துள்ளனர்.

திருவண்ணாமலை மாவட்டம் ஆரணி அருகே கோனையூர் கிராமத்தை சேர்ந்தவர் ஓய்வு பெற்ற ராணுவ வீரர் விஜயன். இவரது மனைவி கஸ்தூரி படவேடு அருகே காளிகாபுரம் கிராமத்திலும், சுப்புலட்சுமி, ராஜலட்சுமி ஆகிய 2 மகள்களும் திருமணமாகி வெளியூரிலும் வசித்து வருகின்றனர்.

கஸ்தூரி அரசு பள்ளியில் ஆசிரியையாகவும், சுப்புலட்சுமி மருத்துவராகவும் பணிபுரிந்து வருகின்றனர். ஓய்வு பெற்ற ராணுவ வீரர் விஜயன், தனது மனைவி கஸ்தூரி மற்றும் மகள்களுடன் பல வருடங்களாக சரிவர பேசாமல் வாழ்ந்து வருவதாக கூறப்படுகின்றது.

சில மாதங்களுக்கு முன்பு முன்னாள் ராணுவ வீரர் விஜயனுக்கும், அவரது மனைவி கஸ்தூரிக்கும் சொத்து தொடர்பாக வாய் தகராறு ஏற்பட்டு, கஸ்தூரியின் உறவினர்கள் முன்னாள் ராணுவ வீரரை மிரட்டியதாக கூறப்படுகிறது.

இந்த நிலையில் கடந்த சில தினங்களுக்கு முன்பு படவேடு கிராமத்தில் உள்ள பிரசித்தி பெற்ற ஸ்ரீ ரேணுகாம்பாள் கோவிலுக்கு சொத்து பத்திரங்களுடன் சென்ற முன்னாள் ராணுவ வீரர் விஜயன், தனது சுமார் 4 கோடி ரூபாய் மதிப்பிலான தனது 2 வீட்டு பத்திரங்களை கோவில் உண்டியலில் காணிக்கையாக செலுத்தினார்.

செவ்வாய்கிழமை ஆரணி படவேடு ரேணுகாம்பாள் கோவில் உண்டியல் காணிக்கை எண்ணும் பணி திருவண்ணாமலை இணை ஆணையர் சண்முக சுந்தரம் மேற்பார்வையில் நடைபெற்றது.

இதில் படவேடு கிராமத்தை சேர்ந்த ஓய்வு பெற்ற ராணுவ வீரர் விஜயன் காணிக்கையாக செலுத்திய 2 வீட்டு பத்திரங்களும் பணத்துடன் உண்டியலில் இருந்து எடுக்கப்பட்டதாக கோவில் நிர்வாகத்தினர் தெரிவித்தனர்.

தகவல் அறிந்து கோவிலுக்கு வந்த விஜயனின் மனைவி மற்றும் மகள்கள் தங்கள் வீட்டு பத்திரத்தை தங்களிடம் கொடுக்க வேண்டும் என்று ஊழியர்களுடன் வாக்குவாதம் செய்தனர்

உண்டியலில் செலுத்தப்பட்டதை உங்கள் கையில் கொடுக்க முடியாது என்று கோவில் நிர்வாகத்தினர் அவர்களை அங்கிருந்து அப்புறப்படுத்தினர்.

தனது சொந்த சம்பாத்தியத்தில் வாங்கிய சொத்துக்காக தனது குடும்பத்தினர் தன்னை மிரட்டி வந்ததாகவும் அதனால் கோவில் உண்டியலில் சொத்து பத்திரத்தை காணிக்கையாக செலுத்தியதாகவும் விஜயன் தெரிவித்தார்

விஜயனின் மூத்த மகள் மருத்துவர் சுப்புலட்சுமி கூறும் போது , உண்டியலில் போடப்பட்ட சொத்துக்களை வாங்கியதில் தனது தாயாரின் பங்கும் உள்ளது.

தந்தை வேறு ஒரு பெண்ணுடன் தொடர்பில் இருந்ததாகவும், அந்த பெண்ணுக்கு சொத்துக்களை எழுதி கொடுக்க எதிர்ப்பு தெரிவித்ததால் கோவில் உண்டியலில் கொண்டு வந்து போட்டுவிட்டதாகவும் குற்றஞ்சாட்டினார்

மேலும் எங்களுக்கு தெரியாமல் எங்கள் தந்தை கோவில் உண்டியலில் காணிக்கையாக செலுத்தியுள்ளார். இது சம்மந்தமாக கோர்ட்டில் வழக்கு தொடுத்துள்ளோம்.

தற்போது ஸ்ரீ ரேணுகாம்பாள் கோவில் நிர்வாகத்திடம் 4கோடி ரூபாய் மதிப்பிலான சொத்து பத்திரத்தை திருப்பி தரக்கோரி மனு அளித்துள்ளோம் என சுப்புலட்சுமி கூறினார்.

அதே நேரத்தில் கோவில் உண்டியிலில் காணிக்கையாக வந்துள்ள பத்திரங்களை திருப்பி தர இயலாது எனவும் ஆணையர் அலுவலகத்தில் பத்திரத்தை ஒப்படைப்போம் எனவும் இணை ஆணையர் சிலம்பரசன் தெரிவித்தார்.

அம்மனின் அருள்பார்வை கிடைக்கும் என்று 4 கோடி ரூபாய் மதிப்புள்ள சொத்து பத்திரங்களை உண்டியலில் போட்ட முன்னாள் ராணுவவீரர் விஜயன், அவர் வீட்டு அம்மணிகளின் உக்கிரபார்வைக்கு ஆளாகி உள்ளார்.