கிருஷ்ணகிரி மாவட்டம் கீழ்புத்தூர் பகுதியில் விஜய் பிறந்தநாள் விழாவை நகரச் செயலாளர் சசிகுமார் தலைமையில் மரம் நடும் நிகழ்ச்சி நடைபெற்றது.

அப்போது அங்கு வந்த கிளைச் செயலாளர் விஜய் என்கிற நாகராஜ் தனது ஏரியாவில் தனக்குத் தெரியாமல் எப்படி நிகழ்ச்சியை நடத்தலாம் என்று கேட்டு நிகழ்ச்சி நடத்தியவர்களை தட்டிக் கேட்டார்.

இதையடுத்து சசிகுமாரின் ஆதரவாளரான தபு என்கிற தப்ரிஷ் தான் மறைத்து வைத்திருந்த கத்தியால் எதிர்த்து பேசியவர்களை தாக்கியதில் மூன்று பேர் காயம் அடைந்தனர்.

இந்த தகவல் அறிந்து நாகராஜன் ஆதரவாளர்கள் அங்கே ஒன்று திரண்டனர் . காரில் வந்திருந்த சசிகுமார் ஆதரவாளர்களை மடக்கினர். மேலும் கத்தியை வைத்து ரகளையில் ஈடுபட்டுக் கொண்டிருந்தவரிடமிருந்து கத்தியை பறித்து அவரது ஆதரவாளர்கள் மூன்று பேரை பதிலுக்கு தாக்கியதாக கூறப்படுகிறது.

ஒட்டுமொத்தமாக இருதரப்பையும் சேர்ந்த தொண்டர்கள் ஆறு பேர் இந்த தாக்குதல் சம்பவத்தில் காயம் அடைந்தனர். அவர்கள் சிகிச்சைக்காக அரசு மருத்துவமனையில் அனுமதிக்கப்பட்டுள்ளனர்.

மேலும் நகர செயலாளர் சசிகுமார் அவரது ஆதரவாளர்கள் வந்திருந்த இரண்டு கார்களும் அடித்து நொறுக்கப்பட்டன.

இந்த சம்பவம் தொடர்பான புகாரில் போலீசார் இருதரப்பை சேர்ந்தவர்கள் மீது வழக்கு பதிவு செய்து விசாரித்து வருகின்றனர். முதலில் கத்தியுடன் ரகளையில் ஈடுபட்ட தபு என்கிற சபரிஸ் மீது பல்வேறு குற்ற வழக்குகள் இருப்பதாகவும் அவர் சரித்திர பதிவேடு குற்றவாளி பட்டியலில் இருப்பதாகவும் தெரிவித்த போலீசார் அவரை தனிப்படை அமைத்து தேடி வருகின்றனர்.

திரையில் கத்தியுடன் தோன்றிய தங்கள் தலைவரைப் பார்த்து தரையில் கத்தியுடன் சண்டையிட்ட தவெக தொண்டர்களால் அங்கு பரபரப்பு ஏற்பட்டது.