ஊருக்குள்ள ஆளுக்கு நூறு பிரச்சனை இருந்தாலும், இந்த ரவுடிகளின் வாரிசுகளான குட்டி பகவதி, குட்டி டிராகனுக்கு எல்லாம் ஒரே பிரச்சனை, அண்ணனுக்கு பிறகு நாம தான் கெத்து... என்று ஊருக்குள் சுற்றித் திரிவது..!

அப்படி ஒரு கெத்து காட்டிய சம்பவத்தால், காலில் மாவுக்கட்டுடன் முகத்தை மறைத்துக் கொண்டு வெட்கத்துடன் வெத்தாக படுக்கையில் கிடக்கும் இவர்தான் கோபிண்ணா தம்பி தீபக்..!`

சரித்திர பதிவேட்டு குற்றவாளியாக போலீசாரால் அழைக்கப்படும் கோபியின் தம்பி தீபக். 21 வயதான இவர் தனது பிறந்த நாளை குடியும் கும்மாளமுமாக கூட்டாளிகளுடன் கொண்டாடினார். வழக்கமாக பிறந்தநாளுக்கு கெத்துக் காட்ட ரவுடி பாய்ஸ் வாளால் கேக் வெட்டுவாங்க... இந்த குட்டி பகவதி தீபக் ஒரு படி மேலே போய்... நாட்டு வெடிகுண்டு வீசி பிறந்தநாளை அதிரவைத்தார்.

அத்தோடு நிற்கவில்லை, அந்த வெடிகுண்டு வீச்சு சம்பவத்தை வீடியோவாக எடுத்து இன்ஸ்டாவில் ரீல்ஸ்ஸாக பதிவிட்டு தனக்கு தானே செய்வினை வைத்துக் கொண்டார் சின்ன தளபதி தீபக்..!

பின்னணி இசையுடன் கெத்து என்று நினைத்து இன்ஸடாவில் அவர் வீடியோ பதிவிட்ட அடுத்த நொடியே விழித்துக் கொண்டனர் செங்கல்பட்டு தாலுகா போலீசார். பொதுமக்களை அச்சுறுத்தும் வகையில் நாட்டு வெடிகுண்டு வீசிய தீபக்கை தனிப்படை அமைத்து தேடத் தொடங்கினர்.

தீபாவளிக்கு ஊரே வெடிக்குது... பிறந்த நாளுக்கு ஒரே ஒரு வெடிய வெடிச்சிட்டு தலைமறைவான தீபக் பதுங்கி இருந்த இடத்தை போலீசார் சுற்றிவளைத்தனர். போலீசுக்கு பயந்து தப்பி ஓடிய நிலையில் தீபக் வழுக்கி விழுந்ததால் வலது காலில் எலும்பு முறிவு ஏற்பட்டதாக தெரிவித்த போலீசார், பெர்த்டே ரவுடி பேபியை மீட்டு மனிதநேயத்துடன் மாவுக்கட்டும் போட்டு விட்டதாக கூறினர்.

காலில் மாவுக்கட்டு போடப்பட்ட நிலையில், தீபக்கை படுக்கவைத்து தூக்கி சென்றபோது தன்னை படம் பிடிப்பதை பார்த்ததும், வெட்கப்பட்டு முகத்தை மூடிக்கொண்டே சென்றார் தீபக்.

பிறந்த நாளுன்னா கேக்க கையால வெட்டினோமா, நாலுபேருக்கு சாக்லேட் கொடுத்தோமான்னு நல்ல பிள்ளையாக இருந்தால் வாழ்த்து சொல்வாங்க, அதை விடுத்து கெத்துக் காட்டுவதற்கு கையில் மெட்டல் கத்தி எடுத்தாலோ, நாட்டு வெடிகுண்டு வீசினாலோ 'கிப்ட்'டாக வழக்கு பாயும் என்று போலீசார் எச்சரிக்கின்றனர்.