அதிமுக முன்னாள் அமைச்சர் எஸ்.பி சண்முகநாதனின் மகனும், தூத்துக்குடி மாமன்ற உறுப்பினருமான ராஜாவை 17 கோடி ரூபாய் மோசடி வழக்கில் போலீசார் கைது செய்தனர். மலேசியாவுக்குத் தப்ப முயன்றவர் விமான நிலையத்தில் சுற்றி வளைக்கப்பட்ட பின்னணி குறித்து விவரிக்கின்றது இந்த செய்தித்தொகுப்பு..

தூத்துக்குடி அதிமுக மாவட்ட செயலாளராக இருப்பவர் முன்னாள் அமைச்சர் எஸ்.பி சண்முக நாதன். இவரது மகன் ராஜா, தூத்துக்குடி மாநகராட்சியின் 59 வது வார்டு கவுன்சிலராகவும் , மாமன்ற எதிர்கட்சி தலைவராகவும் பதவி வகித்து வருகின்றார்.

இந்த நிலையில் கவுன்சிலர் ராஜா தனது காதல் மனைவி அனுஷாவுடன் சேர்ந்து 17 கோடி ரூபாய் வரை மோசடியில் ஈடுபட்டதாக அவரது சகோதரி பொன்னரசி சென்னை மத்திய குற்றப்பிரிவு காவல்துரையில் புகார் ஒன்றை அளித்திருந்தார். அதில், தனது சகோதரர் ராஜாவுக்கு சொந்தமான Omeena Pharma Distributors Pvt. Ltd., என்ற நிறுவனத்தில் முதலீடு செய்தால் 16 % பங்குகள் தருவதாக ஆசை வார்த்தை கூறி , தனது கணவர் அசோக்குமாருக்கு சொந்தமாக ஸ்ரீபெரும்புதூரில் உள்ள 2 ஏக்கர் நிலத்துக்கான ஆவணத்தை வங்கியில் அடமானமாக வைத்து 11 கோடி ரூபாய் கடன் பெற்றுக் கொடுத்தேன். ஆனால் கூறியபடி எந்த ஒரு பங்கும் தராமல் ஏமாற்றிய ராஜா, அந்த பங்கு பணத்தை தனக்கு தெரியாமல் ராஜாவின் மற்றொரு நிறுவனமான Ashun Exim என்ற நிறுவனத்திற்கு மாற்றி கொண்டார்.

அதே போல தூத்துக்குடி மாவட்டத்தில் Golden Blue Metals Pvt. Ltd., என்ற பெயரில், கல்குவாரி தொழில் துவங்க இருப்பதாக கூறிய ராஜா, அதில் முதலீடு செய்தால் அதிக பங்குகள் தருவதாக ஆசை வார்த்தைகள் கூறி தன்னிடம் இருந்து முதலீடாக 300 சவரன் நகைகளை பெற்று சென்றார். நகைகளை அடமானம் வைத்து கிடைத்த பணத்தில் தூத்துக்குடி மாவட்டத்தில் சுமார் 40 ஏக்கர் இடத்தினை அவரது பெயரில் வாங்கி ஏமாற்றி விட்டதாகவும் பொன்னரசி புகாரில் தெரிவித்திருந்தார்.

மேலும் தான் கொடுத்தது போல ராஜினாமா கடிதம் ஒன்றை போலியாக தயார் செய்து அதனை ROC - க்கு ஆன்லைன் மூலம் பதிவேற்றம் செய்து தன்னை மேற்கண்ட நிறுவனத்தின் இயக்குநர் பதவியிலிருந்து நீக்கி விட்டு தனக்கு பதிலாக அவரது மனைவி அனுஷாவை இயக்குநராக நியமித்து தன்னிடம் இருந்து ஒட்டு மொத்தமாக 17 கோடி ரூபாயை ராஜாவும் அவரது மனைவி அனுஷாவும் மோசடி செய்ததாக பொன்னரசி தெரிவித்திருந்தார்.

இது குறித்து மத்திய குற்றப்பிரிவு போலீசார் ராஜாவுக்கு எதிராக வழக்கு பதிவு செய்து விசாரணை நடத்தி வந்தனர். விசாரணைக்கு ஆஜராகாமல் ராஜா தலைமறைவாக இருந்தார். அவர் வெளிநாடு சென்று தலைமறைவாகக் கூடும் என்ற காரணத்தால் ராஜாவிற்கு எதிராக லுக் அவுட் நோட்டீஸ் கொடுக்கப்பட்டது. அதன்படி கடந்த 10ந்தேதி சென்னை விமான நிலையம் மூலம் மலேசியா நாட்டிற்கு சென்று தலைமறைவாகி விடலாம் என்று சென்னை பன்னாட்டு விமான நிலையம் வந்த ராஜாவை மத்திய குற்றப்பிரிவு உதவி ஆணையாளர் காயத்திரி தலைமையிலான போலீசார் சுற்றிவளைத்தனர். விசாரணைக்கு பின்னர் ராஜாவை மோசடி வழக்கில் கைது செய்த போலீசார் எழும்பூர் நீதி மன்றத்தில் ஆஜர்படுத்தி சிறையில் அடைத்தனர்.

முன்னாள் அமைச்சரின் எஸ்.பி சண்முகநாதனின் மகன் மோசடி வழக்கில் கைது செய்யப்பட்டிருப்பது தூத்துக்குடி மாவட்ட அதிமுகவினரிடம் சல சலப்பை ஏற்படுத்தி உள்ளது.