திருத்தணி அடுத்த பள்ளிப்பட்டு அருகே அரசு உயர்நிலைப்பள்ளியில் தமிழ் புத்தாண்டு விடுமுறை நாளில் நடத்தப்பட்ட சிறப்பு வகுப்பில் , பத்தாம் வகுப்பு மாணவர்கள் இருவர் வாயில் பட்டாசு வைத்து ஸ்டைலாக தீப்பற்ற வைத்து வெடித்ததால், வாய் கிழிந்த சம்பவம் நிகழ்ந்துள்ளது 

கைவிரலுக்குள் குருவி பட்டாசை வைத்து பிகில் பட விஜய் போல ஸ்டைலாக சுற்றி தீவைத்ததால் வலது கையில் நடு விரலை பறி கொடுத்து படுத்து இருக்கும் சூழலிலும், வெற்றி முத்திரை காட்டும் இவர்தான் அரசு பள்ளி மாணவர் அபினேஷ்..!

சிவாஜி பட ரஜினி போல, வாயில் பட்டாசை வைத்து தீப்பற்ற வைத்த வில்லங்க விளையாட்டால் வாய் கிழிந்து பிளாஸ்திரியுடன் படுத்திருக்கும் மற்றொரு மாணவர் இவர் ..!

திருவள்ளூர் மாவட்டம் பள்ளிப்பட்டு அடுத்த நெடியம் கிராமத்தில் அரசு உயர்நிலைப்பள்ளியில் 30-க்கும் மேற்பட்ட மாணவ- மாணவிகள் பத்தாம் வகுப்பு படித்து வருகின்றனர். செவ்வாய்க்கிழமை பத்தாம் வகுப்பு பொதுத்தேர்வின் கடைசி தேர்வு என்பதால் வீட்டில் இருந்தால் விளையாட்டுத்தனமாக இருந்து தேர்வில் கோட்டை விடுவார்கள் என்று எண்ணிய ஆசிரியை, அந்த மாணவ மாணவிகளை சிறப்பு வகுப்புக்கு பள்ளிக்கூடத்துக்கு அழைத்ததாக கூறப்படுகிறது.

கொளத்தூர் கிராமத்தைச் சேர்ந்த அபினேஷ் என்ற மாணவன் பையில் மறைத்து எடுத்து வந்திருந்த பட்டாசை எடுத்து விஜய் படத்தில் வருவது போல ஸ்டைலாக பள்ளி வளாகத்தில் வெடிக்க முயன்றுள்ளான், தவறுதலாக தூக்கி வீசும் முன்பே கையில் வெடித்ததால் அவரது வலது கை நடு விரல் துண்டானது மற்ற நான்கு விரல்களும் பலத்த காயம் அடைந்தது

மற்றொரு மாணவர் வாயில் வைத்து பட்டாசை வெடிக்க முயன்ற போது வாயின் அருகில் பட்டாசு வெடித்ததால் வாய் மற்றும் உதடுகள் கிழிந்தது. இருவரும் ரத்தம் சொட்ட பள்ளிப்பட்டு அரசு மருத்துவமனையில் அனுமதிக்கப்பட்டு முதல் உதவி சிகிச்சை அளித்து , மேல் சிகிச்சைக்காக திருவள்ளூர் அரசு மருத்துவமனைக்கு அனுப்பி வைக்கப்பட்டனர்.

விபரீத விளையாட்டால் பட்டாசு விபத்தில் சிக்கி காயம் அடைந்துள்ள இரு மாணவர்களும் நாளை நடக்க இருக்கும் தேர்வு எழுத இயலாத நிலைக்கு தள்ளப்பட்டுள்ளனர். விடுமுறை நாளில் அரசு பள்ளியில் வகுப்பு நடத்தியது குறித்து சம்பந்தப்பட்ட ஆசிரியையிடம் கல்வித்துறை அதிகாரிகள் விசாரித்து வருகின்றனர்.