பொருட்காட்சியில் ராட்சத ராட்டினத்திலிருந்து தவறி விழுந்து இளம்பெண் படுகாயம் அடைந்த சம்பவம் அதிர்ச்சியை ஏற்படுத்தியுள்ளது.


விருதுநகர் கேவிஎஸ் பள்ளி வளாகத்தில் கோடை விடுமுறை மற்றும் மாரியம்மன் கோயில் பொங்கல் திருவிழாவையொட்டி 77-வது பொருட்காட்சி நடைபெற்று வருகிறது. பொருட்காட்சியை காண விருதுநகர் மற்றும் அதனை சுற்றியுள்ள பகுதியைச் சேர்ந்த பொதுமக்கள் அவர்களது குழந்தைகள் குடும்பத்துடன் வந்து செல்கின்றனர்.


இந்நிலையில் விருதுநகர் பாத்திமா நகரைச் சேர்ந்த கெளசல்யா என்ற இளம்பெண், பொருட்காட்சியில் அமைக்கப்பட்டிருந்த ராட்சத ராட்டினத்தில் அமர்ந்திருந்திருக்கிறார். பின்னர் ராட்சத ராட்டினம் கீழ் இருந்து மேல் நோக்கி சுழன்று கொண்டிருந்தபோது, இருக்கையில் அமர்ந்திருந்த கௌசல்யா, திடீரென்று தலைக்குப்புற கீழே விழுந்து படுகாயமடைந்தார். பொருட்காட்சியில் வேடிக்கை பார்த்து கொண்டிருந்தவரின் செல்போனில் இந்த காட்சி பதிவாகி பெரும் பரபரப்பை ஏற்படுத்தியது.

பின்னர் இதுகுறித்து உடனடியாக தகவல் தெரிவிக்கப்பட்டு, அங்கு விரைந்துவந்த 108 ஆம்புலன்ஸ் மூலமாக, காயமடைந்த பெண்ணுக்கு முதலுதவி சிகிச்சைக்குப் பின் தனியார் மருத்துவமனையில் தீவிர சிகிச்சைக்காக அளிக்கப்பட்டுவருகிறது.

இதுகுறித்து தகவல் அறிந்து வந்த மேற்கு காவல் நிலைய போலீசார் விசாரணை மேற்கொண்டு வருகின்றனர். விசரணையில், ராட்டினத்தின் ஹைட்ராலிக் லாக் செய்யப்பட்டிருந்தும் மேனுவலாக லாக் செய்யாததால் பெண் கீழே விழுந்து படுகாயமடைந்ததாக கூறப்படுகிறது. பொழுதுப்போகிற்காக சென்ற ராட்டினத்தில் ஏறிய பெண், கீழே விடுந்து படுகாயமடைந்திருப்பது பெரும் பரப்பரப்பை ஏற்படுத்தியிருக்கிறது. இந்த காட்சி தற்போது சமூக வலைதளங்களில் வேகமாக பகிரப்பட்டுவருகிறது.